"Avropa Parlamentinin Xarici Əlaqələr Komitəsinin Azərbaycana qarşı hazırladığı illik hesabatı üzrə qəbul edilmiş qətnamə heç bir əhəmiyyət daşımır. Çünki bu, Avropa İttifaqının deyil, erməni lobbisinin maliyyəsi ilə işləyən parlamentarilərin mövqeyidir. Onların maliyyə mənbəyui isə Brüsseldə yaşayan erməni əsilli brilyant qaçaqmalçısı Kaspar Karapetyandır".
Bu sözləri Ednews-a açıqlamasında xanım deputat Könül Nurullayeva deyib. Onun sözlərinə görə, kommersiya maraqlarını Avropa İttifaqının maraqlarından üstün tuttan bəzi avroparlamentilər bundan əvvəl də eyni mövqedən çıxış edənlərdir:
"Təsadüfi deyil ki, Prezident İlham Əliyevin Almaniya biznes nümayəndələrini qəbul edərkən bu iyrənc oyunları sərt formada ifşa etdi. Bu iyrənc oyunların arxasında Makron, Borrel kimi islamafob, irqçi, türkofob dairələr, dayanır. Prezident İlham Əliyevin də söylədiyi kimi, bu gün ikili standartlar bir sıra beynəlxalq institutlar, o cümlədən Avropa İttifaqı üçün adi hala çevrilib. Avropa institutları tərəfindən Cənubi Qafqazda Gürcüstan və Ermənistan çox yaxın qəbul edilir, Azərbaycan isə demonizə edilir. Ermənistanın 30 ilə yaxın davam edən işğal siyasəti gözardı edilir, ölkəmizin öz suveren ərazilərində heç bir mülki əhalinin hədəf alınmadığı antiterror tədbirləri isə məqsədli şəkildə pislənilir".
K.Nurullayeva qeyd etdi ki, sonuncu üzdəniraq qətnamə Avropa İttifaqının ümumi xarici və təhlükəsizlik siyasətinin gələcəyinə dair ciddi suallar yaradır:
"Avropa Parlamentinin Azərbaycanın ərazi bütövlüyü və suverenliyinə qarşı nümayiş etdirdiyi hörmətsizlik birmənalı şəkildə rədd olunur. Rəsmi Bakının bəyan etdiyi kimi, nə qədər ki, Avropa İttifaqı öz qurumlarında baş verən bu özbaşınalığa son qoymayacaq, təsisatın xarici və təhlükəsizlik siyasəti beynəlxalq münasibətlər sistemində öz utopik yanaşmalarının əsiri olmaqda davam edəcək.
Amma Azərbaycanın Avropa Parlamenti qarşısında heç bir öhdəliyi yoxdur. Heç kim Azərbaycanla diktə dilində danışa bilməz. Heç bir təzyiq cəhdi bizi öz prinsipial mövqeyimizdən çəkindirə bilməz".
Oğuz
