Rusiya ilə Ukrayna arasında vəziyyət gərgin olaraq qalır. İyunun 15-nə keçən gecə və səhər saatlarında Rusiya silahlı qüvvələri Ukraynanın bir neçə şəhərini PUA və raketlərlə atəşə tutub.
EDnews UNIAN-a istinadən xəbər verir ki, kütləvi hücumlara Xarkov, Kiyev və Kiyev vilayəti məruz qalıb.
Ukrayna KİV məlumatına görə, Rusiya silahlı qüvvələri Xarkovda təcili yardım xidmətinin xilasedicilərinə də zərbələr endirib, ölən və xəsarət alanlar var. Ukrayna daxili işlər naziri İqor Klimenko bildirib ki, hücumların baş verdiyi yerlərdə çalışan xilasedicilər hədəf alınıb. "Xarkovda Rusiya qüvvələrinin hücumu nəticəsində yanğınsöndürən beş xilasedici həlak olub. Ən azı beş nəfər yaralanıb", - Klimenko bildirib. Nazir, həmçinin Rusiyanın Kiyevə kütləvi hücumu nəticəsində mülki infrastruktura ciddi ziyan dəydiyini açıqlayıb.
Xarkov meri İqor Terexov şəhərin Şevçenkivski və Xolodnohirski rayonlarında partlayışların baş verdiyini açıqlayıb. Onun sözlərinə görə, mülki müəssisənin ərazisində yanğın baş verib, xəsarət alanlar var.
Bundan əlavə, Rusiya silahlı qüvvələri Kiyev vilayətinə də PUA, qanadlı və ballistik raketlərlə kütləvi hücuma edib. İlkin məlumata görə, üç nəfər xəsarət alıb, onların arasında uşaq da var.
Rusiya Müdafiə Nazirliyi isə hadisəni təsdiqləyərək açıqlamasında bildirib ki, Rusiya qoşunları Kiyev, Xarkov və Dnepropetrovskda hərbi-sənaye kompleksi obyektlərinə kütləvi zərbələr endirib. Bununla yanaşı Ukraynanın hərbi aerodromlarının və ərazi komplektləşdirmə mərkəzlərinin hədəfə alındığını açıqlanıb. Nazirlikdən əlavə edilib ki, hava hücumundan m üdafiə qüvvələri gecə və səhər saatlarında ölkə ərazisində, eləcə də Qara və Azov dənizləri üzərində 123 Ukrayna PUA-ı zərərsizləşdirib.
Aysel Hacıyeva | EDnews
