“Azyaşlı uşaqlar və qadınları irəli verənlər adətən İran təsiri altında olanlardır” - İlahiyyatçı - ednews.net

25 Sentyabr,

(+994 50) 229-39-11

“Azyaşlı uşaqlar və qadınları irəli verənlər adətən İran təsiri altında olanlardır” - İlahiyyatçı

Cəmiyyət A- A A+
Xəbər verdiyimiz kimi, Şamaxı rayonunda bir qrup şəxsin azyaşlı övladları ilə birgə ziyarətgahlara və pirlərə aparılması və orada dini ayinlərin icrasının təşkil edilməsi ilə bağlı məlumatlar yayılıb. 
 
Hazırda azyaşlıların ziyarətgahlara gedişini təşkil edən 1970-ci il təvəllüdlü Ş.Səbriyeva polis əməkdaşları tərəfindən müəyyən edilib, onun barəsində protokol tərtib olunaraq baxılması üçün məhkəməyə göndərilib. Yasamal Rayon Məhkəməsinin qərarı ilə Ş.Səbriyeva inzibati məsuliyyətə cəlb edilib.
 
Məsələ ilə bağlı ilahiyyatçı-alim Tural İrfan Ednews-a danışarkən bildirib ki, azyaşlı uşaqları dinin, inancın mahiyyəti ilə qavradıqları səviyyədə məlumatlandırmaq yaxşıdır. Lakin xurafatı yox, dini. 
 
 
“Hətta biz təklif etmişik ki, orta məktəblərdə də sadəcə məlumatlandırma, maarifləndirmə xarakterli olaraq dinlərin tarixi, mahiyyəti haqqında dərslik hazırlansın və əlavə oxu kimi şagirdlərə keçilsin. Çünki vaxtında dini məlumat almayan, heç bir təməl dini bilgisi olmayan uşaq böyüyür və dinə olan ehtiyacını ödəmək üçün axtarışa çıxır. Nəticədə əvvəldən bilgisi olmadığına görə və ya aşağı səviyyədə olduğuna görə ya radikal dinçilərin, ya da xurafatçıların cənginə keçir”.
 
T. İrfan qeyd edib ki, İslam dininə görə həddi buluğa çatmamış uşaqlara heç bir dini mükəlləfiyyət yoxdur. 
 
“Hətta onlara namaz, oruc kimi fərz olan ibadətlər də vacib deyil. Pirlər və ziyarətlərə getmək isə ümumiyyətlə İslam dininə aid deyil. Bu əvvəlki dinlərdən qalma işdir. Məktəb uşaqlarını, azyaşlıları pirlərə, xurafat məkanlarına aparmaq doğru deyil. Onlar dərs oxumalı, savad almalıdırlar. Quranın ilk ayəsi "Oxu!" deyə əmr edir, "Pirə get" demir. Ola bilsin qeyd edilən fakt İran təsiri ilə olub. Çünki son günlər İran aktivləşib, Azərbaycana qarşı təxribatlar edir. Ölkəmizdə də bəzi şəxsləri təsir altına sala bilib, hətta bunların içində müəllimlər də nəzərə çarpır”.
 
İlahiyyatçının sözlərinə görə, hər yaş dövrünün öz təlimi, ibadəti var. 
 
“Tutaq ki, Aşura nədən bəhs edir? Qan tökülüb, baş kəsilib, körpələr qətlə yetirilib. İnsanlar ağlayır, başına döyür, sinəsini cırır... Uşağın elə yerdə nə işi var? Psixoloji cəhətdən uçaqlara qətiyyən olmaz elə yerdə dayanmaq. Hətta dinimizə görə qəssab heyvan kəsən zaman onu uşaqların, insanların gözü önündə kəsməməlidir. Heyvan cəmdəyini uşaqların görəcəyi yollardan asmaq günahdır. O ki, qala uşaqları aparasan Aşura mərasiminə, orada insanlar başını yarır, ağlaşır, özünü döyür, üzünü cırır, zəncir vurur və. s. Uşağın yaddaşında qara bir kabus formalaşır din haqqında. Uşaq düşünür ki, din ancaq qılıncla vaxtilə insanların bir-birini qırması deməkdir. Fəqət bu belə olmamalıdır. Uşaqlar təhsilə, elmə, tərbiyəyə cəlb olunmalıdırlar. Dinimiz bunu tələb edir. O müəllimin uşaqları ora aparmasının səbəbləri araşdırılmalıdır görək kimin barmağı var. Müəllim əksinə uşaqları belə xurafatlardan uzaq tutmalıdır, nəinki daha da əksini etsin. Azyaşlı uşaqlar və qadınları irəli verənlər adətən İran təsiri altında olanlardır”.
 
“Təmiz Dünya” Qadınlara Yardım İctimai Birliyinin sədri Mehriban Zeynalova Ednews-a açıqlaması zamanı bildirib ki, uşaqlar ziyarətlərə başlarına qara bağlanıb, ora ərəbcə nəsə yazılıb aparılırsa o bunun qəti əleyhinədir. 
 
 
“Hesab edirəm ki, uşaqları təmamilə fərqli formada bu təsirlərin altına salmaq lazım deyil və buna görə təqsirli şəxslər məsuliyyətə cəlb olunmalıdır. Hansısa ziyarətə illərdir uşaqla və ya tək özü saf niyyət edib gedirsə bunu ifrata vardırmaq və insanları qıcıqlandırmaq da lazım deyil. Görünür, o qadının niyyəti başqa olub ki, onu saxlayıblar. İnsanlar ziyarəti özləri tanıyır. İstər ziyalısı da, istərsə də qeyri-ziyalısı olsun rahatlıq tapmaq üçün əsrlərlə ziyarətlərə gedir. Bunu niyə kimsə təşkil edir? Deməli burada niyyət başqa olub”. 
 
Hüquq müdafiəçisi Sahib Məmmədov açıqlamasında bildirib ki, Ailə Məcəlləsinə görə uşaqları tərbiyə etmək valideynlərin həm hüququ, həm də vəzifəsidir.
 
 
“Vəzifə olan yerdə də həmçinin məsuliyyət olur. Təşkilatçılarla bağlı müvafiq qanunvericilik tətbiq edilməlidir. Amma valideynlər arasında marifləndirici iş aparılmalıdır. Uşaqların gələcəkdə hər hansı dinə etiqad edib etməmək və ya hər hansı ayini yerinə yetirmək və ya ateist təbliğatı aparmaqda seçim etmək hüququ var. Valideynlər körpə yaşlarından uşaqları məqsədli şəkildə nə dini istiqamətdə, nə də onun əksi istiqamətidə yönləndirməməlidirlər. Uşaqları normal tərbiyə etmək lazımdır ki, böyüyəndə seçim edə bilsinlər. Valideynləri məktəbə və ya müvafiq qurumlara dəvət etmək, təşkilatçılar barədə məsuliyyət tətbiq etmək olar. Uşaqların təfəkkürü, dünyagörüşü tam formalaşmamış onları məqsədli yönəltmək fəsadlara gətirib çıxara bilər”.
 
Gülnar Səlimova


Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...