Xəbər verdiyimiz kimi Mətbuat Şurasının yeni sədri Rəşad Məcid oldu. Bu xəbərə sevinələr də oldu, tənqid edənlər də.
Hazırda cəmiyyəti maraqlandıran isə bir sual var - MŞ jurnalistikamızda hansı yeniliklər edəcək?
Ednews bununla bağlı tanınmış jurnalistlərin münasibətini öyrənib. Cavabları təqdim edirik:
Deputat Hikmət Babaoğlu düşünür ki, Rəşad Məcid Azərbaycanda Milli Mətbuatımızın formalaşmasında iştirak edən, onun inkişafına həm üslub, həm də məzmun baxımından töfhələr verməyi bacaran yaradıcı ziyalılarımızdan biridir.
“Onun Mətbuat Şurasına sədr seçilməsi mətbuatımızın hazırki inkişaf mərhələsində yeni keyfiyyət dəyişikliyi yarada bilər. Nəzərə almaq lazımdır ki, elə bir mərhələdən keçirik ki, mətbuat adına iddialı olan həddindən çox müxtəlif platformalar və resurslar var. Hər nə qədər biz onları mətbuat hesab etməsək də belə resursların hər biri özlüyündə kütləvi informasiya vasitəsidir. Yəni ən adi bir sosial şəbəkə hesabında paylaşılan status ən azı 5 min insan üçün əlçatan olursa, bu artıq informasiyanın kütləviləşməsi hadisəsidir. Baxmayaraq ki, həmin profilin peşəkar məsuliyyəti yaxud media subyekti statusu yoxdur, amma fakt faktlığında qalır. Ona görə də Mətbuat Şurası o qədər etibarlı və keyfiyyətli fəaliyyət göstərməlidir ki, vətəndaşların informasiya istehlak etmək tələbatı bu şura ətrafında biləşən media qurumlarından ödənilisin. Beləliklə obyektiv və intellektual informasiya cəmiyyəti formalaşdıra bilək. Bundan başqa hələ də informasiyanı manipuliyasiya edən, istismar vasitəsi hətta silah kimi görən subyektlər var. Onlara qarşı da mübarizə aparmaq xeyli dərəcədə aktualdır. Ona görə də Mətbuat Şurasının qarşısında olduqca mühüm vəzifələr dayanır. Rəşad Məcidin çoxillik media təcrübəsi, ictimai nüfuzu bütün bu vəzifələrin öhdəsindən gəlmək üçün yaxşı perspektivlər yaradır. Əminəm ki, biz Mətbuat Şurasının yeni keyfiyyətdə və daha səmərəli faliyyətini görə biləcəyik”.
Jurnalist Ağa Cəfərli qeyd etdi ki, Rəşad Məcid Azərbaycan mətbuatının qocamanlarındandır. Bu baxımdan Mətbuat Şurasının sədri seçilməsi də bu baxımdan təsadüfü deyil.
“Rəşad müəllimi yaxşı tanıyırıq, bacarıqlı, işini bilən, iş görən adamdır. Təbrik edirəm Rəşad müəllimi. Amma bu gün mediamızdam xüsusi gözləntim yoxdur. Çünki ilk növbədə Mətbuat Şurasının geniş səlahiyyətləri, nəyəsə təsir etmək imkanı yoxdur. Tənqid, polemika olmayan, yerdə isə tərəqqi, inkişaf ola bilməz, mümkün deyil”.
Əməkdar jurnalist, professor Qulu Məhərrəmli bildirdi ki, qurultay adi formada keçirildi. Sədrin dəyişməyini nəzərə almasaq demək olar, qeyri-adi heç nə baş vermədi.
“Son 10 ildə Mətbuat Şurasının fəaliyyətdə olduğu illərdə gözləntilər hədsiz dərəcədə çox olub. 2008-ci ildə qurumun qurultayında nizamnaməyə edilən dəyişiklik və sədrin iki dəfə seçilməsi ilə bağlı məhdudiyyətin aradan qaldırılması MŞ-nın imicini ciddi şəkildə zədələdi. Sonra müəyyən çatlar əmələ gəldi. Təəssüf ki, o çatlar dərinləşdi. MŞ medianın özünü tənizmləməsi və özündə bir çox jurnalist təşkiltlarının media qurumlarını birləşdirən ictimai təşkilatdır. Onun əsas funksiyası media ilə cəmiyyət arasında olan münasibətlərdə müəyyən bir rol oynamaqdır. Xüsusən mətbuatdan olan şikayət və narazılıqların məhkəməyə qədər həllinə nail olmaqdır”.
Q.Məhərrəmli fikirlərinə davam edərək bunları vurğuladı:
“Cəmiyyətimizdə MŞ-la bağlı rəy yaranıb ki, müstəqil deyil. Düşünürəm ki, qurumun fəaliyyəti yenidən qurula bilər. MŞ etik komissiya kimi mediaya, cəmiyyətə və müəyyən ictimai davranışlara təsir edə bilər”.
Sorğunu keçirdi: Oğuz Ayvaz