Keçən həftənin bazar günü Bakı Metropolitenində qəza hadisəsi baş verib. 28 May metro stansiyasında qatar stansiyaya daxil olarkən 68 yaşlı Şərafəddin Abdullayev platformadan yola yıxılıb.
Bəs görəsən, metro stansiyalarında yaranan sıxlığı bu hadisə ilə əlaqələndirmək olar?
“Bakı Metropoliteninin 28 May stansiyasında ötən bazar günü baş vermiş hadisə ilə bağlı onu deyə bilərəm ki, məsələnin səbəbləri ilə bağlı artıq aidiyyatı qurumlar tərəfindən araşdırma aparılır. Bu hadisənin səbələrinin müəyyən edilməsi Bakı Metropoliteninin funksional olaraq səlahiyyətindən kənar məsələdir."
Ednews xəbər verir ki, bu fikirləri "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov deyib. Onun sözlərinə görə, həmin gün stansiyada sıxlıq müşahidə olunmurdu:
"Digər məsələlərə gəldikdə isə onu deyə bilərəm ki, Bakı Metropolitenlərində bazar günləri bir qayda olaraq sərnişin sıxlığı müşahidə olunmur. Buna görə də, hadisə baş verən zaman həmin stansiyada hər hansı bir sıxlıq yox idi.”
Metrolarda insan sıxlığından əmələ gələn qəzaların qarşısını necə almaq olar?
“Bakı Metropolitenində sıxlıqların tənzimlənməsi ilə bağlı isə onu deyə bilərəm ki, iş günlərində səhər və axşam saatlarında əlavə işçi qüvvəsinin ayrılması ilə bağlı tədbirlər görülür. Həmin işçilərə müntəzəm olaraq müxtəlf təlim və təlimatlar keçirilir. Bundan əlavə olaraq, təbii ki, hər bir stansiyada sıxlığın ifrat həddə çatmaması əsas vəzifələrdən biridir. İlk növbədə platforma səviyyəsində müvafiq tənzimləmələr təmin olunur. Zərurət yanacağı təqdirdə isə, eskalator meydançası, stansiyaların yuxarı vestibülləri və hətta zərurət olarsa stansiya girişlərində belə müvafiq tənzimləmələr həyata keçirilir.
Metropolitendə sıxlıqları aradan qaldırmaq üçün gündəlik monitorinq davamlı bir prosesdir. Qeyd etdiyim nəzarət mexanizlərinin çərçivəsinə metropolitenin kifayət qədər çoxsaylı strukturlarının da iş prinsipləri daxildir.
Bunu da bildirim ki, nəzarət mexanizləri sadəcə qatarların hərəkətində deyil, həm də mühəndis texniki qurğular, o cümlədən eskalatorların fəaliyyəti daim diqqət mərkəzində saxlanılır. Bütün bunlara uyğun olaraq müvafiq qərarlar operativ şəkildə qəbul olunur. Çünki, metropolitenin əsas vəzifəsi sərnişinlərin təhlükəsiz daşınmasını təmin etməkdir.”
Fərid
