Avropanın 12 böyük klubu Avropa Superliqasının yaradıldığını açıqlayıb.
Eurasia Diary xəbər verir ki, Real Madrid, Barselona, Atletiko Madrid, Yuventus, AC Milan, İnter, Mançester Yunayted, Liverpul, Mançester Siti, Arsenal, Çelsi, Tottenhem turnirdə iştirakı təsdiq ediblər. Qurumun prezidenti Florentino Perez (Real M), vitse-prezidenti isə Andrea Anyelli (Yuventus) və Con Qleyzer (M. Yunayted) olacaq.
Qitənin ali futbol qurumu olan UEFA məsələ ilə bağlı bəyanat yayıb və Super Liqada iştirak edəcək klublara sərt xəbərdarlıq edib. Bəyanatda qeyd olunur ki, UEFA və digər altı federasiya tərəfindən əvvəlcədən bildirildiyi kimi, bu məsələ ilə əlaqədar həmin klubların milli, Avropa və ya qlobal səviyyədə digər yarışlarda iştirakı qadağan ediləcək. Başqa ölkələrdəki klublara, xüsusilə də qatılmaqdan imtina edən Fransa və Almaniya klublarına təşəkkür edirik.
PSJ, Bayer, Borussiya Dortmund kimi nəhəng klublar turnirdə və qurumda iştirakdan imtina ediblər.
Ekspertlərin fikrincə, Super liqa baş tutacağı halda UEFA ən az 50 milyard avroya yaxın zərərə uğrayacaq. Qurumun UEFA Çempionlar Liqası və UEFA Avropa Liqası üzrə bu mövsümün oyunlarının müvəqqəti olaraq dondurulması qərarını alması PSJ-nin avtomatik olaraq çempion elan edilməsi variantını da labüd edir. İnfrastruktur sərmayələrini dəstəkləmək və COVİD-19-un yaratdığı böhranı tarazlaşdırmaq üçün Avropa Super Liqasında qurucu klublara ümumilikdə 3,5 milyard avro ödəniləcək.
Turnirin formatına gəlincə isə 2 qrup və hər qrupda 10 komanda olmaqla ümumilikdə 20 komanda birincilik uğrunda mübarizə aparacaq. Qrupda ilk 4 pillədə qərarlaşanlar play off mərhələsinə yüksələcəklər. İlkin məlumatlara əsasən, 15 komanda daimi olaraq hər il turnirə qatılacaq. Oyunların həftə içi baş tutması gözlənilir.
