Florida ştatında "milyarderlərin sığınacağı" kimi tanınan İndian Creek adası gözlənilməz bir böhranın mərkəzinə çevrilib: tualet tullantıları problemi ştatın qanunvericilik gündəminə çıxarılıb.

“EDnews” xəbər verir ki, Florida sahilində yerləşən və yalnız ultra-zənginlərə açıq olan süni İndian Creek Village adası "milyarderlər sığınacağı" ləqəbi ilə tanınır. Quru ilə əlaqə yalnız xüsusi körpü vasitəsilə mümkündür və bu keçid ictimaiyyət üçün qapalıdır. Adanın girişində silahlı mühafizəçilər və yüksək səviyyəli təhlükəsizlik sistemləri mövcuddur.

Bununla belə, adanın sakinləri – aralarında Ceff Bezos da olmaqla – insanlıqla hələ də bir şeyi bölüşmək niyyətindədirlər: tualet tullantılarını.

Varlı qonşuların  kanalizasiya mübahisəsi

İndian Creek adasında yeraltı kanalizasiya sistemi yoxdur. Bu səbəbdən tullantıların qonşu Surfside qəsəbəsinin infrastrukturu vasitəsilə regional sistemə ötürülməsi planlaşdırılıb. Lakin Surfside rəhbərliyi bu proses üçün İndian Creekdən 10 milyon dollar ödəniş tələb edib.

İndian Creek isə bu tələbi "şantaj” kimi qiymətləndirib. Adanın hüquqşünası Stefan C. Helfman məsələni belə izah edib: "Biz də onlarınki kimi müstəqil yerli idarəetməyə malikik. Üstəlik Surfside da varlı bir bölgədir. Niyə bizdən pul istəsinlər?"

Məsələ ştat senatına çıxarılıb

İndian Creek rəhbərliyi problemin həlli üçün Florida ştat qanunverici orqanına müraciət edərək lobbiçilik fəaliyyətinə başlayıb. "New York Times” qəzetinin məlumatına görə, adada yaşayan şəxslərdən biri - prezident Donald Trampın kürəkəni Cared Kuşner də bu prosesdə fəal iştirak edib.

Effektiv lobbiçilik nəticəsində ştat qanunvericiləri, yerli idarələrin bəzi kanalizasiya xətlərinə müdaxilə etməsini və ya ödəniş tələb etməsini qadağan edən maddəni yeni nəqliyyat qanun layihəsinə əlavə ediblər. Qanunun qüvvəyə minməsi üçün yalnız qubernator Ron DeSantisin imzası yetərlidir.

Bələdiyyə başçısının  müraciətdən xəbəri yoxdur

Surfside bələdiyyə başçısı Çarlz Burkett İndian Creekin bu qanun dəyişikliyi üçün Tallahasseeyə müraciət etdiyindən xəbərsiz olduğunu bildirib. Onun sözlərinə görə, İndian Creekə ştat rəhbərliyindən zəng gəldikdən sonra vəziyyətdən xəbər tutub. Burkett məsələni belə şərh edib: "Dedilər ki, sadəcə bir qanun çıxararıq və məsələ həll olar".

Milyarderlərin "boru” planı

İndian Creek rəhbərliyi ərazidəki köhnə septik sistemləri ləğv edərək ətraf mühit normalarına uyğun kanalizasiya xətti qurmaq niyyətindədir. Hüquqşünas Helfman, adanın Surfsidedəki ictimai bir küçənin altından 10 sm diametrində bir boru çəkmək istədiyini açıqlayıb. Bu boru vasitəsilə tullantılar birbaşa regional kanalizasiya sisteminə ötürüləcək.

Lakin Surfside rəhbərliyi bu boru üçün inzibati icazə verməkdən imtina edib və dəfələrlə 10 milyon dollar ödəniş tələb edib. İndian Creek bu tələbləri qəbul etməyib.

Ştat adminstrasiyası müdaxilə etdi

İndian Creek rəsmiləri bu cür problemlərin digər şəhərlərdə də yarana biləcəyi barədə xəbərdarlıq edərək məsələni ştat səviyyəsinə daşıyıblar. Nəticədə Florida ştat qanunvericiliyi, bələdiyyələrin belə layihələri əngəlləməməsi üçün hüquqi dəyişiklik edib. Yeni qanun, septik sistemdən kanalizasiya sisteminə keçid zamanı yerli idarənin razılığı olmadan belə, ictimai küçələrin infrastruktur məqsədilə istifadə olunmasını mümkün edir.

Sistem qurulur, qarşıdurma isə davam edir

İndian Creek hal-hazırda öz kanalizasiya sistemini inşa edir və yalnız Surfsidedəki bir ictimai küçə vasitəsilə boru bağlantısı qurmaq niyyətindədir. Məqsəd, mahal hökuməti tərəfindən idarə olunan ümumi infrastruktur sisteminə qoşulmaqdır.

Zənginlərin tullantılarını qonşularının infrastrukturu ilə daşımağa çalışması, müasir cəmiyyət quruluşuna ironik bir metafor kimi görünür. Milyardlarla dəyəri olan əmlaklarda yaşayan şəxslər, ən əsas ehtiyaclarını belə başqa bir icmanın resurslarına arxalanaraq qarşılamaq məcburiyyətində qalırlar. Bu isə "var-dövlət” anlayışına dair düşündürücü bir mənzərə yaradır.