"İsrailin müdafiə naziri İsrael Katsın İranla mümkün müharibə barədə açıqlamaları kifayət qədər ciddi qəbul edilməlidir. Çünki burada söhbət təkcə siyasi ritorikadan deyil, həm də İsrailin müstəqil hərbi addımlara hazır olduğunu nümayiş etdirməsindən gedir".
EDnews xəbər verir ki, bunu rusiyalı hərbi ekspert Yevgeni Mixaylov Katsın İran tərəfindən raket zərbələri endiriləcəyi təqdirdə İsrailin Tehranla müharibə vəziyyətinə düşə biləcəyi barədə sözlərini şərh edərkən deyib.
Mixaylovun sözlərinə görə, İsrail və İran arasında birbaşa hərbi toqquşma riski yüksək olaraq qalır. Bununla belə, hər iki tərəf genişmiqyaslı müharibənin hansı nəticələrə gətirib çıxara biləcəyini yaxşı anlayır.
“Hazırda biz sərt ritorika, hərbi planlaşdırma və psixoloji təzyiq cəhdlərinin bir arada olduğunu görürük. İsrail göstərir ki, sonsuz danışıqları gözləmək niyyətində deyil və İran tərəfindən təhlükəni birbaşa hiss edərsə, müstəqil hərəkət etməyə hazırdır. İsrail silahlı qüvvələri İrana qarşı müstəqil əməliyyat planı hazırlamaq tapşırığını iki istiqamətdə qiymətləndirmək olar. Bir tərəfdən bu, Tehrana təzyiq elementidir, digər tərəfdən isə güc ssenarisi də daxil olmaqla müxtəlif vəziyyətlərə real hazırlıqdır"- deyə ekspert bildirib.
ABŞ-nin roluna toxunan hərbi ekspert bildirib ki, Vaşinqton bu prosesdə əsas oyunçulardan biri olaraq qalır. Onun sözlərinə görə, ABŞ bir tərəfdən eskalasiyanın qarşısını almağa və danışıqlar prosesini qorumağa çalışır, digər tərəfdən isə İsrailin əsas müttəfiqidir.
“Ciddi gərginlik yaranacağı təqdirdə ABŞ-nin kənarda qalması olduqca çətin olacaq. Məhz buna görə Amerika diplomatiyası hazırda vəziyyətin açıq hərbi münaqişəyə çevrilməsinin qarşısını almağa çalışır”, - deyə Mixaylov qeyd edib.
Ekspertin fikrincə, İsrail və İran arasında mümkün birbaşa toqquşma yalnız bu iki ölkə ilə məhdudlaşmayacaq. Livan, Suriya, İraq və Fars körfəzi regionu da risk altında qala bilər.
Mixaylov Hörmuz boğazı faktoruna da diqqət çəkib. Onun sözlərinə görə, bu ərazidə istənilən təhlükə dünya enerji bazarlarına təsir göstərəcək.
“Neft və qaz qiymətlərinin artması, təchizatda fasilələr və Fars körfəzində hərbi mövcudluğun güclənməsi hətta məhdud münaqişənin belə birbaşa nəticələri ola bilər”, - deyə o bildirib.
Mixaylov vurğulayıb ki, belə bir eskalasiya Yaxın Şərq üçün yeni qeyri-sabitlik mərhələsi demək ola və hələ də mövcud olan kövrək diplomatik kanalları sıradan çıxara bilər.
Onun sözlərinə görə, hazırkı vəziyyət son dərəcə təhlükəlidir. Katsın açıqlamalarını hələlik İrana təzyiqin bir hissəsi kimi qiymətləndirmək mümkündür, lakin müəyyən şərtlər daxilində ritorika qısa zamanda real hərbi addımlara çevrilə bilər.
Aysel Hacıyeva | EDnews
