İran və İsrail arasında açıq hərbi qarşıdurma ehtimalı zaman-zaman arxa plana keçsə də, sərt bəyanatlar və raket zərbələri ilə bağlı xəbərdarlıqlar vəziyyətin hələ də "kövrək" olduğunu göstərir.
İsrailin müdafiə naziri İsrael Katzın “İran İsrail ərazisinə raket zərbələri endirərsə, ölkə artıq sabah İranla müharibə vəziyyətində ola bilər” fikri də bu baxımdan diqqət çəkir.
Belə bir açıqlama isə real hərbi hazırlığın siqnalı, yoxsa Tehrana ünvanlanmış siyasi xəbərdarlıq olması baxımından suallar doğurur.
Mövzu ilə bağlı politoloq Oqtay Qasımov EDnews-a danışarkən qeyd edib ki, bu, ilk növbədə, İsrailin Livan ərazisində əməliyyatları hələ də dayandırmaması ilə bağlıdır:
"İsrail Livanda “Hizbullah” hədəflərinə zərbələr endirir və bu əməliyyatların davam edəcəyini bəyan edir. İran isə bildirir ki, əgər ABŞ ilə imzalanmış razılaşmanın şərtlərinə uyğun olaraq İsrail Livan ərazisində əməliyyatları davam etdirərsə, o zaman İsrail əraziləri yenidən hədəfə çevrilə bilər. Bu baxımdan, İsrail və İran arasında savaş ehtimalı hələ də qalır və bu ehtimal kifayət qədər yüksəkdir. Baxmayaraq ki, ABŞ tərəfi davamlı gərginliklər fonunda diplomatik prosesi irəlilətməyə çalışır, hazırda tərəflər arasında idarə olunan gərginlik mövcuddur".
Məsələnin birdəfəlik həllinə gəlincə isə Oqtay Qasımov vurğulayıb ki, yaxın perspektivdə bunun real olduğunu demək çətindir:
"Bunun üçün iki fundamental şərt yerinə yetirilməlidir. Birincisi, İsrail Yaxın və Orta Şərqdə ekspansionist siyasətindən əl çəkməli, Livan, Qəzza və digər ərazilərdəki əməliyyatlarını məhdud çərçivədə saxlamalıdır. İsrail təhlükəsizlik arqumentini əsas gətirərək qonşu ölkələrin ərazilərini ilhaq etməməli və bu istiqamətdə addımlar atmamalıdır. İkincisi, İran da İsrailə qarşı Yaxın və Orta Şərqdə öz mövqelərini gücləndirmək üçün dəstəklədiyi proksi qüvvələrə yardımı dayandırmalıdır. Əgər bu şərtlər yerinə yetirilərsə, o zaman məsələnin birdəfəlik həlli mümkün ola bilər. Yaxın perspektivdə bu şərtlərin reallaşacağına dair real gözləntilər hələlik yoxdur. Bu səbəbdən İsrail-İran xəttində gərginliyin davam etməsi ehtimalı daha yüksək görünür".
Aytac Kərimova | EDnews
.png)
