Azərbaycan Milli Elmlər Akademiyasının (AMEA) İmadəddin Nəsimi adına Dilçilik İnstitutunun direktoru, professor Nadir Məmmədli yeni orfoqrafiya lüğətinin sentyabr-oktyabr aylarında hazırlanaraq AMEA-nın Rəyasət Heyətinə təqdim ediləcəyini bildirib.
EDnews "APA"ya istinadən xəbər verir ki, onun sözlərinə görə, hazırda yeni orfoqrafiya lüğəti izafət birləşmələrindən təmizlənir.
"Azərbaycan dilində ərəb-fars mənşəli sözlərin izafət birləşmələri qalmaqdadır. Məsələn, "əhvali-ruhiyyə" sözündə izafət tərkibində "i" saiti işlədilir. Biz isə bunu milli dil normalarına uyğun olaraq "əhval-ruhiyyə" şəklində təqdim edə bilərik. Hazırda bu tip sözlərlə bağlı ciddi iş aparılır", – deyə Nadir Məmmədli bildirib.
İnstitut direktoru qeyd edib ki, hazırda yeni orfoqrafiya lüğəti üzrə 175 280 söz üzərində iş gedir və yekunda bu rəqəm arta və ya azala bilər.
O əlavə edib ki, əcnəbi dillərdən söz götürmək əvəzinə, qarşılığı mümkün olduqda həmin anlayışların Azərbaycan dilinin daxili imkanları hesabına formalaşdırılmasına üstünlük verilir.
Professor həmçinin orfoepiya lüğətinin hazır olduğunu və Nazirlər Kabinetinə təqdim edildiyini bildirib. Onun sözlərinə görə, lüğətin quruluşunda müəyyən dəyişikliklər edilib və Nazirlər Kabineti orfoepiya qaydalarını təsdiqlədikdən sonra nəşrə hazır olacaq.
.jpg)
