Ukraynanın istefaya göndərilməsi gözlənilən Baş naziri Yuliya Sviridenkonun Prezident Volodimir Zelenskinin Ofisinin rəhbəri vəzifəsini icra edə biləcəyi bildirilir.
EDnews xəbər verir ki, bu barədə Ali Radanın deputatı Olqa Vasilevskaya-Smaqlyuk məlumat yayıb.
Onun sözlərinə görə, Ukrayna Baş Kəşfiyyat İdarəsinin rəhbəri Kirill Budanov isə müdafiə naziri vəzifəsinə gətirilə bilər.
Deputat "'Telegram" kanalında yazıb ki, Sviridenkonun Zelenski Ofisinin rəhbəri, Budanovun isə Müdafiə Nazirliyinin rəhbəri postuna keçməsi gözlənilir.
Qeyd edək ki, Prezident Volodimir Zelenski daha əvvəl Sviridenko hökumətini istefaya göndərmək niyyətində olduğunu açıqlayıb. "Reuters"in məlumatına görə, Zelenski bu addımı müdafiə imkanlarının gücləndirilməsi, ölkənin Avropa İttifaqına inteqrasiya prosesinin sürətləndirilməsi və Rusiyanın enerji infrastrukturuna mümkün hücumlarına daha yaxşı hazırlıqla izah edib.
Ali Radada hökumətin istefası ilə bağlı səsvermənin iyulun 14-də, yeni nazirlərin təyinatının isə iyulun 16-da keçirilməsi gözlənilir.
