Bakı Dövlət Universitetinin Jurnalistika fakültəsi əzəldən özünəməxsus maraqlı bir ənənəyə malikdir. Belə ki, burada təhsil alan tələbələr, fakültənin müəllimləri tərəfindən müxtəlif mətbu orqanlara aparılır, yeni praktiki biliklərə yiyələnir və redaksiya mühiti ilə tanış olma imkanı əldə edirlər.
Bu gün belə imkanlardan birini də biz qazandıq. Fakültənin Sosial məsələlər və tələbələrlə iş üzrə dekan müavini Samir Xalidoğlu bizi Beynəlxalq Avrasiya Mətbuat Fonduna (BAMF) aparacağını söylədi. Beləcə, vaxt itirmədən məkana doğru yol aldıq...
Hava çiskinli, bir o qədər də soyuqdur. Əslində, havanın belə olması, nə fəslə uyğundur, nə də ki arzuolunandır, lakin necə deyərlər: "Qışla bahar bir olarmış"...
Yol boyu müəllimimiz bizlə öz təcrübələrini bölüşür, biz də maraqla dinləyir, zamanın necə keçdiyindən xəbərsizcə gəlib-çatırıq ünvana
Həyəcanlıyıq... Amma bu məsuliyyət həyəcanıdır.
Zamandan israf etmədən, içəriyə daxil oluruq. İçəriyə girər-girməz bizi BAMF-ın sədri Umud Mirzəyev qarşılayır. Tanış oluruq. Ardınca Umud bəy bizə təşkilatın fəaliyyəti dövrü ərzində imza atdığı bir neçə yerli, beynəlxalq layihələrdən, milli və hərbi zəmində səylərindən bəhs edir. O danışdıqca, otaqın hər bir köşəsində yer alan çərçivələrə nəzər yetiririk. Bunların hər biri yerli və beynəlxalq layihələrdən xoş xatirələrdir. Davamında, Umud bəy öz xatirələrindən söz açaraq, müəllifi olduğu kitablardan bəhs edir.
Bir müddət sonra Əl-Cəzirə Tədqiqatlar Mərkəzinin tədqiqatçısı Thembisa Fakudenin təşkilata gələcəyi bildirilir. Düzü, bu, bizim üçün gözlənilməz, eləcə də xoş olur. Beləcə, Thembisa Fakude içəri daxil olur. Tanışlıq mərhələsindən sonra, qonaqla həmsöhbət olub, sahə ilə bağlı fikirləri və təcrübələrini öyrənirik. Maraqlı söhbətin ardınca, Umud bəyin özünün və digər yerli, xarici yazarların müəllifi olduğu kitablardan ibarət kitabxanaya gedirik. Kitabların qoxusu, qapıya yaxınlaşdığımız andaca hiss edilir. Çox zövqverici mənzərədir...
Elə otağı tərk edən zaman bu kitablardan bizə hədiyyə olaraq təqdim edilir. Sonra bu anı ölümsüzləşdirmək üçün kollektiv şəkil çəkdiririk. O an düşünürəm ki, bəlkə də bu şəkil də digər çərçivələrin yanında yer alacaq...
Artıq vaxt-vədə yetişir. Beləcə, sağollaşıb, xoş xatirələr və dəyərli kitablarla mərkəzdən ayrılırıq...
Yol boyu isə, sadəcə reportaja başlıq düşünürəm və belə qərara gəlirəm ki, fəaliyyəti ərzində daima media və vətəndaş cəmiyyətinin inkişafında mühüm rol oynayan bir təşkilatdan yazırıqsa, bu sadəcə belə ola bilər: "Həqiqətin və İnformasiyanın keşikçilərindən".
