İsrailin doqquz aydan çox davam edən şiddətli hücumlarına baxmayaraq, HƏMAS-ın Qəzzanın şimal və mərkəzi hissələrindəki hərbi batalyonlarının demək olar ki, yarısı döyüş potensialının bir hissəsini bərpa edib.

Ednews xəbər vverir ki, bu məlumat Müharibə Araşdırmaları İnstitutu, Amerika Sahibkarlıq İnstitutunun “Kritik Təhlükələr” layihəsi və CNN-in birgə hesabatında bildirilir.

24 iyulda Konqresin birgə iclasında çıxış edən İsrailin Baş naziri Binyamin Netanyahu, HƏMAS üzərində "Qələbənin" "artıq yaxın olduğunu" bildirsə də, hərbi ekspertlər başqa fikirdədirlər.

Hadisə yerindən çəkilmiş kadrlar və ekspertlər və şahidlər ilə müsahibələr əsasında HƏMAS-ın hərbi əməliyyatlarının təhlili, İsrail liderinin iddialarını şübhə altına alır. HƏMAS-ın iyul ayına qədər olan fəaliyyətini əhatə edən araşdırma göstərir ki, Fələstin hərəkatı məhdud resurslardan səmərəli istifadə edir.

"İsraillilər təmizlənmiş ərazilər haqqında danışırlar, lakin onlar bu əraziləri tam təmizləməyiblər, onlar [HƏMAS döyüşçülərini – red.] ümumiyyətlə məğlub etməyiblər. HƏMAS döyüşməyə hazırdır", - deyə “Kritik Təhlükələr” layihəsinin (CTP) Yaxın Şərq üzrə eksperti və Müharibə Araşdırmaları İnstitutu (ISW) ilə HƏMAS və İsrailin hərbi fəaliyyət modellərini öyrənən birgə araşdırmanın rəhbəri Brayan Karter bildirib.

CTP və ISW belə nəticəyə gəlir ki, HƏMAS-ın səkkiz tam döyüş qabiliyyətli batalyonu və mühasirəyə alınmış anklavın şimal və mərkəzində on üç deqradasiyaya uğramış batalyonu var.

Bu hesabat üçün müsahibə verilmiş Amerika hərbi ekspertləri, İsrailin şiddətli bombardman kampaniyası və müharibədən sonrakı planın olmamasının HƏMAS-ın hərbi dirçəlişini təşviq etməyə kömək etdiyini bildiriblər.

"İsrailin yanvar ayında Qəzzanın şimalından getməsindən cəmi bir həftə sonra HƏMAS-ın dirçəlişini müşahidə etməyə başladıq", - deyə Karter bildirib.

İyulun ortalarında İsrail qəzeti The Times of Israel İsrail ordusunun hesabatının məzmununu dərc etdi. Hesabatda, doqquz aylıq müharibəyə baxmayaraq, HƏMAS-ın hərbi infrastrukturunun çox hissəsinin qorunub saxlandığı və fələstin hərəkatının tunel şəbəkəsinin hələ də "yaxşı funksional vəziyyətdə" olduğu qeyd olunub.

Xatırladaq ki, yanvar ayında İsrail ordusu HƏMAS-ın Qəzzadakı tunel şəbəkəsinin uzunluğunun 350-450 mil təşkil etdiyini və "gözlənildiyindən xeyli çox" olduğunu qiymətləndirib. Müdafiə Nazirliyinin nümayəndəsi İsrail qəzetinə bildirib ki, tunellərin sökülməsi illər çəkə bilər.

Əkbər Novruz