Prezident yanında Antiinhisar və İstehlak Bazarına Nəzarət Dövlət Agentliyi təşəbbüskarı və operatoru olduğu istehlakchi.az saytını təqdim edib.
“EDnews” xəbər verir ki, sayt barədə Dövlət Agentliyinin İctimaiyyətlə əlaqələr və maarifləndirmə sektorunun müdiri Gülnar Hüseyn məlumat verib.
Onun sözlərinə görə, layihənin əsas məqsədi istehlakçılara, xüsusilə də həssas qruplara hüquq və vəzifələri barədə məlumat verməkdir: "Sayt istehlakçılara bir növ bələdçilik edərək, onların alqı-satqı prosesində, ticarət obyektlərində və yaxud ictimai şəbəkələrdə məhsul və yaxud xidmət əldə edərkən qarşılaşdıqları problemlərin həlli üçün qanunvericiliyin təqdim etdiyi bütün təminatlardan istifadə etmələri istiqamətində üsullar və hüquqi müdafiə alətləri təqdim edir".
G.Hüseyn bildirib ki, layihə çərçivəsində inzibati orqanlarla yanaşı məhkəmə yolu ilə müdafiə vasitələrinə dair maarifləndirmə aparılır: "Eyni zamanda, mediasiya, mediatorların dəstəyi və yaxyd ictimai birliklərin yardımı kimi alternativ həll yolları da təqdim olunur. Məqsəd odur ki, istehlakçı hansı halda hara müraciət etməli olduğunu, hüququ pozularsa problemin həllini hansı inzibati orqanda və yaxud məhkəmədə axtarmalı olduğunu bilsin".
Onun sözlərinə görə, layihənin əsas bölmələrindən biri "Hara müraciət edim?"dir: "Burada ilkin olaraq sahibkarı birinci yerə qoymuşuq ki, istehlakçı və sahibkar münasibətləri qarşılıqlı etimad əsasında qurulsun. Əgər istehlakçı mal və ya xidmət alarkən problemlə qarşılaşırsa, ilk olaraq sahibkara müraciət etməlidir. Bu, vaxt itkisini azaldacaq və istehlakçının problemini çevik həll etməsinə imkan yaradacaq. Əgər sahibkar ona cavab verməkdən imtina edərsə, istehlakçı digər hüquqi müdafiə vasitələrindən istifadə edə bilər".
G. Hüseyn qeyd edib ki, layihə əsasən maarifləndirməyə yönəlib: "Gələcəkdə bu platformanın daha geniş funksionallığa malik olması planlaşdırılır. Əgər dövlət qurumları, müvafiq orqanlar və yaxud istehlakçı hüquqlarının müdafiəsində rol oynayan digər təşkilatlar təşəbbüs irəli sürsə, onların məlumatlarını da bu platformaya inteqrasiya etmək mümkündür. Məqsəd istehlakçılar üçün aydın və əlçatan məlumat mənbəyi yaratmaqdır. İstehlakçılar istədikləri informasiyanı bu saytda real nümunələr əsasında əldə edə biləcəklər".
