Son günlər bəzi kənd təsərrüfatı məhsullarının , xüsusən də pomidorun qiyməti əsas müzakirə mövzusudur. Bir çox dükan –bazarlarda pomidorun kilosu nəinki 1 manata, artıq 1.50-1.70 manata satılır. İyul ayı üçün bu qiymət nonsens sayılır.
Eurasia Diary xəbər verir ki, "musavat.com"un müxbiri bu günlərdə paytaxtda aqrar məhsulların topdan və pərakəndə satışını həyata keçirən “8-ci kilometr ” bazarına baş çəkib. Qiymətlər nəinki alıcıları, elə satıcıları da narazı salıb. Onlar topdansatış mərkəzlərindən götürdükləri məhsulların günbəgün artdığını bildirirlər. Xüsusən də pomidor, xiyar, soğan, gilas, alça kimi məhsullarda bu özünü daha çox göstərir. Nəticədə alıcılıq azalır və məhsul satışının həcmi öncəki dövrlərlə müqayisədə aşağı düşür.
Qiymətlərə gəlincə, hazırda bazarda ən çox ucuzlaşan məhsul kartofdur, kiloqramı bir həftə öncə 1 manat olsa da, hazırda 50-55 qəpik arasında dəyişir. Soğanın qiyməti isə əksinə, çox bahadır, hər ilin bu dövründə soğan 20-30 qəpiyə satılsa da, indi 90 qəpik – 1 manat arasındadır. Ən çox rezonansa səbəb olan pomidor isə 60 qəpikdən 1.20 -1.50 manata yüksəlib, hətta bazarda kənarda bəzi kiçik dükan və mağazalarda 1.50-1.70 manata da təklif olunur. Badımcanın kiloqramı hər il bu dövrdə 30-40 qəpiyə düşürdüsə, bu il iki dəfə baha 60-80 qəpiyə satılır. Xiyar da bahalaşaraq, 70 qəpiyi ötməkdədir. Sarımsağın kiloqramı isə 1 manatdır.
Bostan məhsullarından qarpızın kiloqramı 35, yemişin 1 kq-ı isə 60 qəpikdir. Kələm 40-50 qəpiyə, qarğıdalının 3-4 ədədi 1 manatadır. Meyvələrdən ucuzlaşmamaqda israrlı olan gilas və alçadır ki, gilas 3.50 manatdan başlayır. Alçanın qiyməti 3-5 manat arasında dəyişir. Ərik bir qədər ucuzlaşıb, cır ərik 2.50 manata, sort əriklər isə 3 manatdan başlayan qiymətlərlədir. Armud və almanın kiloqramı 1.50 civarındadır.
Səbəblərə gəlincə, satıcılar bildirdilər ki, son 10 gündə ki, kartofun qiyməti ucuzlaşıb: “1 manata satılan kartof indi 60 qəpiyə düşüb. Bazarda ən çox Tovuz kartofudur. Gədəbəy kartofu çox azdır. Bazarda Gürcüstan, Rusiya, Belarusiya kartofu da var. Yerli məhsul onlardan daha ucuz olduğundan iş adamlarına idxal sərf etmir. Kartof bolluğu qiymətlərə də təsir edir. Soğanı şok həddə bahalaşmasının səbəbini isə satıcılar ixracla əlaqələndirirlər: “Hazırda bazarda Bərdə soğanı satışdadır. Ağdam soğanı demək olar ki, yoxdur. Səbəbi isə ixracla bağlıdır. Bundan əlavə, bu il soğan sahələrini xəstəlik də vurdu və bu da məhsuldarlığın azalmasına səbəb oldu”.
Alıcılar da son günlər bazarda qiymətlərdən şok keçirdiklərini etiraf etdilər. Pomidorun 1.50 manata, soğanın 1 manata qalxması onları da narahat edir. Qadınlar isə qışa tədarüklə bağlı bu il heç nə edə bilmədiklərindən təəssüflənirlər.
