Azərbaycan Dövlət Neft Fondu (ARDNF) hindistanlı mühacirlərin Dubayda bir məktəb əsasında təsis etdiyi, dünyanın ən böyük özəl təhsil təminatçılarından biri olan “GEMS Education”a 100 milyon ABŞ dolları məbləğində sərmayə qoyur.

Fonddan Ednews-a verilən məlumata görə, ARDNF-dən başqa Kanadanın “Brookfield Asset Management Ltd.” investisiya şirkətinin rəhbərlik etdiyi, tərkibinə həmçinin Dubayda yerləşən “Gulf Islamic Investments”, “Marathon Asset Management” şirkətlərinin də daxil olduğu konsorsium layihəyə sərmayə yatıracaq.

"Bu sövdələşmənin ümumi dəyəri 2 milyard ABŞ dolları təşkil edir", - Fonddan bildirilib.

Müqavilənin digər maliyyə təfərrüatları açıqlanmayıb. Amma “Bloomberg News” daha əvvəl Kanada şirkətinin təxminən 2 milyard ABŞ dolları sərmayə qoymağı planlaşdırdığını bildirmişdi. Bu, sövdələşməni Fars körfəzində özəl biznesə ən böyük kapital investisiyalarından birinə çevirəcək.

“Bu addım “CVC Capital Partners”ə körfəzdəki ilk özəl kapital sərmayəsinə daxil olduqdan beş il sonra GEMS-dəki payını əhəmiyyətli dərəcədə azaltmağa imkan verəcək. Bununla belə şirkət bu cəlbedici bölgəyə gələcək sərmayələrə tam sadiqdir”, - CVC-nin Yaxın Şərq üzrə rəhbəri Özgür Önder bildirib.