Qarabağda aparılan yenidənqurma və bərpa işləri bu regionda yaradılacaq şəhərlərdə yaşıl enerjidən istifadə olunması böyük potensial daşıyır. İnkişaf edən yaşıl enerjinin regionda enerji təlabatını ödəməsi və yaşıl şəhərciklərin yaradılması məsələsi böyük gözləntilər doğurur.
Qarabağın təbii-coğrafi şəraitini nəzərə alsaq bu ərazilərdə yaşıl keçidin əhəmiyyəti nədən ibarətdir? Ümumiyyətlə, tamamilə yaşıl enerjidən faydalanan şəhərciklər yaratmaq mümkündür?
“Bizim ilkin məqsədimiz insanları doğma məskənlərinə geri qaytarmaqdır. Bunu təmin etmək üçün də məşğulluğu təmin etmək lazımdır. Buna görə də yeni müəssisələr yaradılmalıdır. Bu il Azərbaycanda keçirilən COP29-un əsas məqsədi də iqtisadi dayanıqlılıqdır. Bu üzrə aparılan işlərdə ekologiyaya zərər vurulmamalıdır. Bu baxımdam yaşıl enerji əlbəttə ki, prioritetdir.”
Bu fikirləri Ednews-a müsahibəsi zamanı iqtisadçı ekspert Emin Qəribli bildirib. Ekspert yaşıl enerjinin məsrəflərinin daha az olduğunu qeyd edib:
“Bizim çox məhsuldar ehtiyatlarımız var. Şərqi Zəngəzurda çaylar, Cəbrayılda günəş elektrik stansiyaları tikiləcək. Azərbaycanın bütün imkanlar var və dövlət bu sahəyə kifayət qədər investisiya ayırır. Orada açılan müəssisələrin xərcləri də ucuz olacaq. Çünki yaşıl enerji artıq ucuz başa gəlir.”
Qarabağın yaşıl enerji sahəsində ciddi potensialı olduğunu qeyd edən iqtisadçı ekspert, Qarabağın investorlar üçün cəzbedici olduğunu vurğulayıb:
“Məsrəflərin aşağı olması burada çoxlu sayda müəssisələrin açılacağı deməkdir. Bu müəssisələrin açılması da regiona iqtisadi marağı artıracaq. Burada yaşıl enerji üçün imkanlar var. Ona görə də, gələcəkdə kimsə azad iqtisadi zona yaratmaq istəsə düşünəcək ki, Bakıda yaratsın, yoxsa Qarabağda.
Təbii ki, Qarabağda iqtisadi fəaliyyət göstərməyin bir üstünlüyü olacaq ki, burada enerji məsrəfləri daha məqsədəuyğundur. Bu baxımdan bu regionda iş fəaliyyətinin aparılması və ucuz enerjinin mövcud olması buraya investisiyaları cəlb edəcək.”
Qarabağ 4-cü sənaye inqilabında ən sürətli inkişaf edən regionlardan biridir:
“Bizim bu sahədə hədəflərimizə nəzər salsaq görə bilərik ki, burada məhz 4-cü sənaye inqilabına keçid də baş verir. Bu inqilab əsasən müsair texnologiyaların istifadə edilməsinə əsaslanıb. Bütün bunlardan belə bir nəticəyə gəlmək olar ki, Qarabağ bu sahədə ən hazır region kimi çıxış edəcək.
Qarabağa – öz keçmiş yaşayış məskənlərinə geri qayıdan vətəndaşlar əsaən Bakıdan və digər şəhərlərdən köç edirlər və onlar bu texnologiyalara kifayət qədər tez alışacaqlar. Qarabağda insanların yeni texnologiyalara uyğunlaşması bizim üçün problem olmayacaq.”
Fərid Axund
