“Rusiya Avrasiya İqtisadi Birliyi (AİB) çərçivəsində Ermənistana bir sıra iqtisadi güzəştlər təqdim edir və bu, ölkənin iqtisadi dayanıqlığına təsir göstərir”.
Politoloq Məhəmməd Əsədullazadə bunu EDnews-a açıqlamasında bildirib. Onun sözlərinə görə, Ermənistan üçün ən mühüm üstünlüklərdən biri enerji sahəsində tətbiq edilən qiymət fərqləridir.
“Rusiya Ermənistana təbii qazı təxminən 165 dollar qiymətinə satır. Dünya bazarında isə bu rəqəm daha yüksək – təxminən 500–600 dollar civarında dəyişir. Bu fərq Ermənistan iqtisadiyyatı üçün ciddi üstünlük yaradır”.
M.Əsədullazadə əlavə edib ki, AİB çərçivəsində Ermənistan məhsulları Rusiya bazarına daha əlverişli şərtlərlə çıxış əldə edir:
“Ermənistan məhsulları Rusiyaya daha asan şərtlərlə, gömrük maneələrinin minimum olduğu şəraitdə ixrac olunur. Bu da ölkədəki iş adamları üçün əlavə imkanlar yaradır və iqtisadi aktivliyi artırır”.
Politoloqun sözlərinə görə, bu üstünlüklər Ermənistan iqtisadiyyatının müəyyən mənada ayaqda qalmasına dəstək verir.
Onun fikrincə, Baş nazir Nikol Paşinyanın Avropa ilə inteqrasiya xətti Moskva tərəfindən diqqətlə izlənilir.
“Seçkilərdə Paşinyanın qələbəsi və Avropaya inteqrasiya yönümlü siyasəti Rusiyada narahatlıq yaradır. Buna görə də Rusiya tərəfi AİB-in Ermənistana verdiyi iqtisadi üstünlükləri daha çox qabardır və bu mexanizmin əhəmiyyətini xatırladır”, – deyə o qeyd edib.
M.Əsədullazadənin fikrincə, Ermənistan yaxın perspektivdə AİB-dən çıxmağa tələsməyəcək, çünki mövcud iqtisadi faydalar ölkə üçün əhəmiyyətlidir.
“Düşünürəm ki, Ermənistan AİB-i tərk etməyə tələsmir, çünki iqtisadi baxımdan bu birlikdən ciddi faydalar əldə edir. Lakin siyasi proseslər gələcəkdə daha da mürəkkəbləşə bilər və Ermənistan həm Avrasiya, həm də Avropa istiqamətində balans siyasəti aparmağa davam edəcək”, – deyə politoloq vurğulayıb.
Qeyd edək ki, Rusiyanın xarici işlər naziri Sergey Lavrov bildirib ki, İrəvanın Avropa İttifaqı və Avrasiya İqtisadi İttifaqı arasında seçim etməsi lazımdır: “Ermənistan artıq Avropa İttifaqına qoşulmaq haqqında qanun qəbul edib, ona görə də məsələ onsuz da aktualdır”.
Aysu Əsədova | EDnews
