Azərbaycan, Gürcüstan və Türkiyə parlament sədrlərinin iştirakı ilə üçtərəfli əməkdaşlıq formatı yaradılacaq.
“EDnews” xəbər verir ki, bu barədə məlumat Türkiyə Böyük Millət Məclisinin sədri Numan Kurtulmuş və Gürcüstan parlamentinin sədri Şalva Papuaşvili arasında keçirilən görüşdən sonra verilib. Görüş Daşkənddə baş tutan Parlamentlərarası İttifaqın 150-ci Assambleyası çərçivəsində keçirilib.
Yeni əməkdaşlıq platforması qurulur
Görüş zamanı Numan Kurtulmuş həmkarını yenidən parlament sədri seçilməsi münasibətilə təbrik edib və bildirib ki, xalqın iradəsi hər zaman əsasdır, nəticələrə hörmət gələcək inkişafın təməlidir.
Tərəflər Gürcüstan və Türkiyənin uzunmüddətli və məhsuldar münasibətlərini, xalqlar arasında dostluq və tərəfdaşlığı yüksək qiymətləndiriblər. Bu əlaqələrin parlamentlərarası səviyyədə daha da genişləndirilməsi və səmərəli əməkdaşlıq formatlarının yaradılması vurğulanıb.
Region üçün yeni diplomatik səhifə
Numan Kurtulmuş və Şalva Papuaşvili parlament sədrləri səviyyəsində Gürcüstan-Türkiyə-Azərbaycan üçtərəfli əməkdaşlıq formatının yaxın zamanda reallaşdırılması barədə razılığa gəliblər. Bu addım regional çağırışlara birgə cavab verilməsi baxımından strateji əhəmiyyət daşıyır.
Şalva Papuaşvili Gürcüstanın suverenliyi və ərazi bütövlüyünə verdiyi dəstəyə görə Türkiyəyə təşəkkürünü bildirib. Həmçinin, tərəflər Gürcüstan və Türkiyə arasında strateji tərəfdaşlığın daha da dərinləşdirilməsinə dair razılıq əldə ediblər.
Şəms Qasımlı // EDnews
