Antalyada keçirilən IV Diplomatiya Forumu çərçivəsində “Cənubi Qafqazda regional əməkdaşlıq üçün çağırışlar və imkanlar” mövzusunda mühüm panel müzakirəsi təşkil olunub. Paneldə Azərbaycan xarici işlər naziri Ceyhun Bayramov, Ermənistan xarici işlər naziri Ararat Mirzoyan və Gürcüstan xarici işlər naziri Maka Botçorişvili iştirak ediblər. Moderatorluq TRT World əməkdaşı Auskar Surbaktinə həvalə olunub.

Paneldə əsas diqqət Cənubi Qafqazda mövcud vəziyyət və təhlükəsizlik məsələlərinə yönəlib. Azərbaycan və Ermənistan arasında sülh prosesində son irəliləyişlər, sərhədlərin delimitasiyası və kommunikasiyaların açılması müzakirə olunub. Tərəflər bu məsələlərin regionda uzunmüddətli sabitliyin bərqərar olunmasında mühüm rol oynayacağını bildiriblər.

Azərbaycan və Gürcüstan arasında strateji tərəfdaşlıq, xüsusilə enerji və nəqliyyat sahələrindəki əməkdaşlıq vurğulanıb. Gürcüstanın regiondakı diplomatik təşəbbüslərdəki fəal mövqeyi panel iştirakçıları tərəfindən yüksək qiymətləndirilib. Paneldə Türkiyə və Ermənistan arasında davam edən normallaşma prosesi də diqqət mərkəzində olub. Sərhədlərin açılması və diplomatik əlaqələrin bərpasının Cənubi Qafqazda sabitliyə müsbət təsir göstərəcəyi vurğulanıb.

Panel müzakirələri zamanı regionun davamlı və inklüziv inkişaf yolları da dəyərləndirilib. Cənubi Qafqaz ölkələrinin birgə əməkdaşlıq imkanlarının artırılması, beynəlxalq tərəfdaşların bu prosesə töhfəsi və gələcəkdə regionun sabit və proqnozlaşdırılan inkişaf modeli qurması məsələləri ön plana çıxıb.

Paneldə Gürcüstanın neytral mövqeyi və dialoqu təşviq edən siyasəti xüsusi vurğulanıb. Gürcüstanın həm Azərbaycan, həm də Ermənistanla yaxşı münasibətləri sayəsində regionda körpü rolu oynaya biləcəyi qeyd olunub.

Mədinə Məmmədova\\EDnews