13 İyun tarixində Avropa çempionatının seçmə oyunu çərçivəsində Ermənistanın paytaxtı İrəvan şəhərində Ermənistan və Ukraynanın gənclərdən ibarət futbol komandaları qarşılaşıb. Ukrayna millisinin üzvü Eldar Quliyev oyunda qollardan birininin müəllifi olaraq fərqlənib. Görüş 0:2 hesabı ilə Ukrayna milli komandasının qələbəsilə başa çatıb.
Ednews öz ölkələrində erməniləri məğlubiyyətə uğradan bu gənclə həmsöhbət olub. Müsahibə zamanı Eldar bildirib ki, o, həm də babası, böyük akademik Hətəm Quliyevin adını layiqincə təmsil edir.
Beləliklə maraqlı söhbətimiz başlayır...
- Eldar, istərdim ilk olaraq özünüz haqda qısaca məlumat verəsiniz. Ukraynada nə zamandan yaşayırsız?
- Kiyevdə anadan olmuşam. 20 yaşım var, anadan olandan Ukraynada yaşayıram.
- Futbola həvəs haradan yarandı? Futbol karyeranız necə başladı?
- Məktəbdə 1-ci sinifdə oxuyarkən məşqçi sinifləri bir-bir gəzərək uşaqlar toplayırdı, onlara futbola yazılmağı təklif edirdi. Bunu eşidəndə mən evə gəldim və atama futbola getmək istədiyimi bildirdim. Beləcə “Ednost” komandasında oynamağa başladım.
- Hansı komandalarda çıxış etmisiz? Futbolda hansı uğurlarınız var?
- Uzun müddətdir ki, Ukrayna Premyer Liqasında oynayıram. Ukraynanın 21-yaşlılardan ibarət millisində çıxış etmək üçün təklif aldım və qəbul etdim. “Ednost”, “Dinamo”, “Arsenal”, “Dnepr”, “Şaxtyor”, “Mariupol” və “Minay” kimi komandaların tərkibində çıxış etmişəm. Sonuncu medalıma 17-yaşlılardan ibarət “Şaxtyor” futbol yığması ilə Ukrayna çempionu adını qazananda layiq görülmüşəm.
- Debüt oyunu olaraq Ermənistanın paytaxtında oynamaq və komandaya qalibiyyət gətirmək necə bir hissdir?
- Onların sahəsində oynamaq xüsusi bir zövq verirdi. Xüsusən də oyun Ukrayna üçün belə çətin bir zamanda keçirilirdi. Həm də Azərbaycan üçün belə prinsipial rəqiblə mübarizədə məndə ikili motivasiya var idi. Ona görə bu mənə xüsusi güc verdi və komandamız qalibiyyət qazandı. Mənim üçünsə bu qələbə xüsusi önəm kəsb etdi.
- Bildiyimiz qədər siz 16 yaşında Azərbaycan millisində oynamaq üçün təklif almısınız, lakin bunu qəbul etməmisiniz. Buna səbəb nə idi?
- Yox, əksinə, təklif olunduqdan sonra, mən milli komandaya gəldim. Lakin sonradan ikinci dəfə gələndə “Şaxtyor” klubundan bildirdilər ki, bu mümkün deyil və mən geri qayıtmağa məcbur oldum.
- Bir az ailəniz haqda danışardız.
- Hazırda atam Şahbaz Quliyev Ukrayna müharibəsində iştirak edir. İndi anam İnna, qardaşım Ruslan və Floki adlı itimizlə birgə yaşayıram. Atam və anamın 44, qardaşımın 21 yaşı var. Flokininsə artıq 5 yaşı olacaq. (gülür)
- Babanız Hətəm Quliyevlə münasibətiniz necə idi? Azərbaycana gəlib-gedirsizmi?
- Bizim babamla hər zaman çox gözəl münasibətimiz olub. Tez-tez zəngləşərdik. Onunla hər şey haqda danışa bilirdim. Azərbaycana tez-tez gəlmirəm, amma bir neçə dəfə orda olmuşam.
- İstedadlı nəslin nümayəndəsiniz. Belə bir ailənin varisi olmaq sizin üçün nə deməkdir?
- Bu mənim üçün böyük məna kəsb edir. Yəni istədiyim qeyri-adi bir şey deyil. Mən də bir çox insanlar kimi çalışıram ki, hər zaman mənsub olduğum şəcərəni layiqincə təmsil edim. Onlardan geri qalmamaq və nəslimizə layiqli bir davamçı olmaq istəyirəm.
HAŞİYƏ: Eldar Quliyev Ukrayna və Avropanın məşhur klublarından olan Donetskin “Şaxtyor” Futbol Akademiyasının yetirməsidir. Gənc futbolçu Azərbaycanın dünya şöhrətli alimi Hətəm Quliyevin nəvəsidir. Atası Şahbaz Quliyev, Ukrayna Ordusunun Xüsusi Təyinatlı Qüvvələrində komandir vəzifəsində çalışır. Hazırda Rusiyaya qarşı müharibənin ən qızğın nöqtəsində döyüşür.
Eldarı hələ uşaq ikən “Real-Madrid”, “Barselona”, “Mançester Yunayted”, “Bavariya” və s. kimi məşhur komandalar transfer etmək istəyirdi. Lakin babası akademik Hətəm Quliyevin təklifi ilə o klubların təklifini qəbul etməyib. Hətəm Quliyevin fikrincə, əsas nəvəsinin məşhurluğu deyil, onun düzgün yetişməsi idi.
Gülnar Səlimova