Xəbər verdiyimiz kimi, iyunun 11-də minifutbol üzrə Azərbaycanın yığma komandası tarixində ilk dəfə Avropa çempionu adını qazanıb.
Elə komandamızı finala aparmaqda əsas rollardan biri də baş məşqçinin üzərinə düşüb. Elşad Quliyev oyunçulara oyun texnikası ilə yanaşı, onlara qalibiyyət iradəsini də bəxş edib. Onlara Zəfərə gedən yolda işıq tutub.
Beləliklə, baş məşqçi ilə görüşüb söhbətləşdik. Söhbət əsnasında idmançı Ruminiya komandasına ilk məğlubiyyətlərinin səbəblərindən də danışıb.
“Rumıniya yığması ilə ilk oyunda rəqibi tam tanımırdığımıza görə məğlub olduq. Final oyunda isə rəqibi demək olar ki, tam öyrənə bilmişdik. Rəqibin əsas iki oyunçusu, kapitan və 8 nömrəli idmançısının mövqeyinə daha yaxın komanda üzvlərimizdən qoyaraq zərərsizləşdirdik. Bu zaman onlar topla az təmasda oldular. Bundan sonra rəqibin oyunu dağıldı və biz qalib gəldik.
Söhbətimiz maraqla davam etdi:
- Cənab Prezidentin də çıxışında vurğuladığı kimi, legionersiz, yerli azərbaycanlılardan ibarət komandanın uğurunun əsas sirrini nədə görürsüz?
- Legioner maddiyat qarşılığında çıxış edir, amma yerli futbolçular öz ölkəsini təmsil edir.
- Çempionatdakı komandaların səviyyəsinin aşağı olduğunu deyib millinin uğuruna kölgə salmaq istəyənlər var. Siz bu haqda nə düşünürsüz?
- Biz “Mançester City” və ya “Real Madrid”dəki futbolçularla çıxış etmirik. Küçədən yığdığımız futbolçularla milli komanda düzəldib qitə səviyyəsində olan Avropa çempionatının qalibi olmuşuq. Ard-arda 6 oyun qələbə çalmaq heç kimə zarafat gəlməsin. İnşallah, bu başqalarına da qismət olar. Bu oyunlara bütün Azərbaycan baxıb, o görüşlərin heç biri asan keçməyib.
- Artıq bir neçə komanda üzvlərinə bəzi Avropa klublarından təkliflər olduğu deyilir. Bu söz-söhbətlər nə dərəcədə doğrudur?
- Komanda üzvlərinə Avropa klublarından təkliflər gəldiyini dəqiq deyə bilmərəm, ancaq niyə də olmasın. Mən çox istəyərəm ki, bizim uşaqlar dünya səviyyəsinə çıxsınlar, özlərini daha da inkişaf etdirsinlər. Millinin toplanışları olanda onsuz da onları geri çağıracağıq, ona görə burda heç bir problem olmaz.
- Bir azarkeş kimi deyərdiz, Azərbaycanın minifutboldakı bu uğuru əsas millisinə nə dərəcədə təsir edə bilər?
- Düşünürəm ki, bu uğur Azərbaycan milli komandasının Avropa çempionu olması o biri komandalara da müsbət təsir edəcək. Əsas millimiz, ya futzal və ya çimərlik futbolu olsun, bunlar üçündə bir stimul olmalıdır. Azərbaycanda gördülər ki, futbolu nə qədər sevən insanımız var. Buna görə indiyədək zəif çıxış edənlər üçün bu bir motivasiya olacaq.
- MFL və ALFA liqalarından hansı dəstəyi gözləyirsiz?
- ALFA liqa və MFL indiyə qədər bizə dəstək veriblər. Onların çempionatından götürdüyümüz oyunçulardan milli komandanı qurmuşuq. 13 futbolçumuzun hamısı həmin çempionatda oynayıblar. Onlar da bizə bu qələbəni bəxş etdilər. Bizə bu cür dəstək olduqları üçün "MFL" və "Alfa Liqa"ya da buradan öz təşəkkürümü bildirirəm.
Qeyd edək ki, yığmamız Slovakiyanın Koşitse şəhərində keçirilən çempionatın finalında qitə birinciliklərinin ən titullu komandasını - altıqat Avropa çempionu Rumıniyanı 1:0 hesabı ilə məğlub edərək qızıl medala sahib olub. Oyunda yeganə qolu qarşılaşmanın 25-ci dəqiqəsində Seymur Məmmədov vurub.
Final görüşündən sonra çempion Azərbaycan millisinin qolkiperi Davud Kərimi minifutbol üzrə Avropanın ən yaxşı qapıçısı, Bəxtiyar Sultanov isə qitə çempionatının ən yaxşı oyunçusu seçilib.
Gülnar Səlimova
.jpg)
