Dünyada maraqlı və qeyri-adi peşələr çoxdur. Əsas insan üçün sevdiyi işlə məşğul olmasıdır. Deyirlər “Evdən işə, işdən evə tələsən insanlar dünyanın ən xoşbəxt insanlarıdır”. Bu gün söz açacağımız qəhrəman da o insanlardandır. Onun sevdiyi işi və gözəl ailəsi var.
Qəhrəmanımız Vladimir Qolovanov (Bob Unique) zirvələri fəth etməyi sevir. Məhz elə hündürlüyə olan sevgisi də onu sənaye alpinisti peşəsinə gətirib. Bu gün o Bakının ən məşhur göydələnlərini fəth etməklə məşğuldur. Bob şəhərimizi daha da gözəlləşdirən binaların fasadlarına dırmanaraq onların daha da gözəl qalmasına kömək edir.
O, dünyada ən təhlükəli işlər siyahısına salınan peşələrdən biri ilə sənaye alpinizmi ilə məşğul olur. Peşəsi ilə bağlı maraqlı suallarımıza cavab tapmaq üçün Bobla görüşüb, söhbətləşmək qərarına gəldik. Düşündük ki, həmsöhbətimiz sayəsində bizi maraqlandıracaq bir çox məqamlara aydınlıq gətirə biləcəyik.
Əsl adı Qolovanov Vladimir Valeryeviç olan alpinist 10 sentyabr 1989-cu ildə Azərbaycanda doğulub. Milliyyətcə slavyan rusudur. Sənaye alpinisti kimi fəaliyyət gostərən Bob təlim mərkəzində alpinist, xilasetmə, hündürlükdə iş və qaydalar üzrə təlimçi kimi də çalışıb.
Bobdan ilk olaraq, onun ləqəbi barədə soruşuruq. Maraqlıdır, Vladimir niyə özünə “Bob” ləqəbi seçib?
- Bu çoxdanın, 2004-cü ilin söhbətidir. Yaxın dostlarımla uşaqlıqdan bir-birimizə söz verdik ki, böyüyəndə dünyanı gəzəcəyik, Avropaya, ABŞ-da yaşayacağıq. Bu ölkələrə məsələn ABŞ-da Samir adı qəribə gəlməsin deyə onu qısaltdıq Sam oldu, Maksim Max, Emilə ad qoymadiq(gülür), məni isə fikirləşəndə Vladimir - Vova – Вов, ingliscə Bob qoyduq. Bu günə qədər adım elə qalıb. Amma uşaqlar sözünü tutub, bircə məndən başqa. Samir indi Almaniyadadır, Emil Çexiyada, Marat Fransada, Gena New-Yorkda yaşayır, arada bura da gəlirlər. Mənim üçün əziz xatirədir.
- Alpinizmə maraq haradan yarandı, əsasən deyirlər yüksəklikdən qorxan insanlar sonradan alpinist olurlar. Sizdə bu necə olub?
- Alpinizmlə 2000-ci ildən məşğul oluram. Məktəbdə “Borya” ləqəbli Mübariz adlı gənc fəal alpinizm-dağçılıq adlı əlavə bir dərs keçirdi. O bunu təmənnasız edirdi, məqsəd sadəcə alpinizmə maraq oyatmaq idi. Bu məni özünə cəlb etdi, zamanla bu mənə daha da maraqlı oldu və bu yolu seçdim. Hündürlükdən isə heç vaxt qorxmamışam.
- Alpinist kimi hansı zirvələri fəth etmisiz?
- Sənaye alpinistləri zirvələri deyil, binaları fəth edirlər (gülür). İşimdən həzz alıram. Bir ay fasilə yarananda elə bilirəm nəsə çatışmır. Həmin hissləri yenidən yaşamaq istəyirəm. Bu hər zaman üçün belədir. Bir də qış aylarında adətən nazik geyinirik, çunki iplə sallanarkən soyuq olmur. Yəqin ki, bu adrenalinlə ələqədardır. Nə qədər ki, ipdəsən soyuq deyil, amma ayaqların yerə dəyən kimi soyuqdan ölürsən (gülür).
- Demək olar ki, dünyanın ən təhlükəli peşəsi ilə məşğulsuz. Göydələnlərə qalxanda sizdə xüsusi hisslər olurmu? Heç hündürlüyə qalxanda “Görəsən, yerə enmək mənə qismət olacaq?” kimi düşüncələr ağlınızdan keçir?
- “Görəsən yer mənə qismət olacaqmı?” fikri təhlükəli anlarda yada düşür. Amma alpinistlərin arasında belə bir söz var. Gəlin bir siqaret çəkək, bəlkə bu siqaret axırıncı olacaq (gülür). Mən isə siqaret çəkən deyiləm(yenidən gülür)
- Sirr deyilsə, qazancınız nə qədərdir?
- Qazanca gəldikdə, atalar sözü yadıma düşür. “Qadının yaşını, kişinin də pulunu soruşmazlar” (gülür). Amma ümumi deyə bilərəm ki, maaşlar 800-7000 manat aralıqda dəyişir. Bu şirkətdən, sənin bacarığından, sertifikatlarin sayından və s. asılıdır.
- Bakı hündürlükdən necə görünür? Oradakı təsvir aşağıdakı görünüşlə nə ilə fərqlənir?
- Bakı yüksəklikdən elə möhtəşəm görünür ki… Ən gözəl mənzərələr bizdədir. Biz buludların içində oluruq. Bakı gecə saatlarında hündürlükdən çox gözəldir, sanki Bakıda deyilsən Las-Veqasdasan (gülür).
- Ekstrim hisslərinizi daha hansı məşğuliyyətlə basdırırsız?
- Bizim istrahətimiz də extremal keçir. Zip line (kanatla sürüşmək) yaradırıq, rope jumping (hündürlükdən iplə tullanma) edirik, bir necə dəfa paraşütlə atlamışam, off-road-a (yolsuzluq avtomobili ilə çətin şəraitdə sürücülük) gedirik, kvadrasikl (3 çarxlı motosiklin avtomobil ilə hibrididi) sürürük və s. Çox zəngin bir gün keçirirəm, hər günüm maraqlı olur, çox şeylər baş verir, əlavə məşğuliyyətə boş vaxt qalmır.
- Başınıza gələn ekstrim hadisələr yəqin ki, olub. İlk ağlınıza gələn hadisədən bəhs edərsinizmi?
- Başıma çox hadisələr gəlib. Bir dəfə ipim qırılıb, sonra kvadrasikli aşıb, daha sonra isə dənizdə üzərkən balıq toruna ilişib, son anda qurtulmuşam. Qardaşım yanımda olmasaydı, mən indi həyatda deyildim. Hadisələr çox olub, çox şükür ki, sonu yaxşı qurtarıb.
- İstərdim bir az da ailənizdən danışasınız. Həyat yoldaşınız azərbaycanlıdır. Necə tanış olmusuz?
- Bəli, yoldaşım azərbaycanlıdır. Tanışlığımız təsadüfən olub və aramızda ilk görüşdən sevgi yaranıb, uzun məsələdir(gülür). Atam rəhmətə gedib, anam yanımdadır. Mənim bütün qohumlarım Rusiyadadır. Burada həyat yoldaşımın qohumları var.
- Evdə hansı dildə danışırsız?
- Evdə hər dildən istifadə edirik. Azərbaycan, rus, ləzgi, ingilis. Uşaqlar biz az böyüsün Çin dilini öyrənməyə başlayacayıq (gülür).
- Azərbaycanın ən bəyəndiyiniz və bəyənmədiyiniz adətləri?
- Azərbaycanın demək olar hər bir adətini bəyənirəm. Gözəl atalar sözləri var. İnsanlar bir-birlərinə yardım edirlər, dəstək olurlar. İstənilən adamdan yol soruşsan göstərəcək, səni başa düşməsələr də səni gedəcəyin ünvana ötürəcək. Bir şeyi bəyənmirəm - bəzi toy adətlərini. Toyda şəxsin imkanından asılı olmayaraq qızılın alınması vacibdir. Əksər hallarda isə bu qızıllar sadəcə bir dəfə istifadə olunmaqla qalmır, həm də gənc ailəni maddi cəhətdən çətin vəziyyətdə qoyur. Bununla da lazımsız xərclər gənc ailəni daha da çətin vəziyyətə, borca salır.
- Azərbaycan mətbəxi çox koloritli yeməklərdən ibarətdir. Hansı yeməkləri daha çox bəyənirsiz?
- Ən dadlı mətbəx elə Azərbaycan mətbəxidir. Sobanın ustundə buğlama, “üç bacı” dolması, şah plov, kabablar və dolma mənim ən sevdiyim təamlardır.
Sonda bizə Boba uğurlar diləmək qalır.
“Sizə işlərinizdə uğurlar arzulayırıq. Daima zirvələrə doğru, yolunuz yarımçıq qalmasın heç vaxt”
Gülnar Səlimova