“Rusiya Mozambiki hərbi sursatla təmin etməyə hazırdır”.
Bu sözləri Rusiyanın xarici işlər naziri Sergey Lavrov Maputoda danışıqların yekunlarına dair mətbuat konfransında deyib.
Rusiyalı nazir qeyd edib ki, Rusiya silahlarının tədarükü Afrika ölkəsinin müdafiə qabiliyyətinin təmin edilməsinə və antiterror potensialının artırılmasına xidmət edəcək.
Mozambik Lavrovun Afrika turnesinin üçüncü ölkəsi oldu.
Bundan əvvəl Rusiya Xarici İşlər Nazirliyinin rəhbəri Keniya və Burundiyə səfər edib.
Lavrov Maputoda Mozambik prezidenti Filipe Nyusi və xarici işlər nazirinin müavini Manuel Xose Qonçalves ilə danışıqlar aparıb.
Moskvanın Ukrayna ilə müharibə aparmaq üçün silaha ehtiyacı olduğu təqdirdə, niyə Mozambikə silah satır?
Bu sualın cavabını Ednews-a müsahibəsində politoloq Sergey Stankeviç verib.
O, qeyd edib ki, silah tədarükü əsasən atıcı silahlardan ibarətdir və onlar Moskvanın ehtiyatında böyük miqdardadır.
“Moskva Mozambiki, əsasən, onun anbarlarında böyük miqdarda olan atıcı silahlarla təmin edəcək. Bu, terrorla mübarizə məqsədləri üçün kifayətdir. Bundan əlavə, patron, mərmi və mina istehsalı zavodlarının tikintisinə köməklik göstəriləcək.
S. Sergey bildirib ki, “Rosneft” intensiv olaraq karbohidrogenlərin çıxarılmasına və qonşu Afrika ölkələri ilə ticarət üçün neft məhsulları istehsalına başlayacaq.
“Mozambikin Maputo və Beyra limanları Moskva üçün böyük maraq doğurur. Artıq Rusiyadan Mozambikə, o cümlədən, qonşu ölkələrə daşınmaq üçün taxıl və gübrələr gətirilir. Rosneft-in Mozambik şelfinin üç blokunda karbohidrogenlərin kəşfiyyatı və hasilatı üzrə müqavilələri var. Artıq iş başlanıb. Bu, həm də Rosneft-ə qonşu Afrika ölkələri ilə ticarət üçün neft məhsulları istehsal etməyə imkan verəcək”.
Sonda politoloq Sovet İttifaqı dövründə iki ölkə arasında yaşanan xoş xatirələrdən danışıb və bildirib ki, Moskva Mozambiklə köhnə münasibətləri “diriltməyə” çalışır.
“İndiyə qədər Rusiyanın Mozambiklə münasibətləri əsasən sovet dövründəki sıx əməkdaşlıq xatirələri ilə qidalanırdı. SSRİ Portuqaliyadan müstəmləkə asılılığından qurtulmaq uğrunda gedən müharibədə Mozambikə həlledici köməklik göstərdi. Mozambikdə elitanın əhəmiyyətli bir hissəsi, xüsusən də hərbçilər keçmiş yaxın ittifaqla bağlı isti xatirələrini saxlayırlar. Moskva Mozambiklə köhnə münasibətləri canlandırmağa və onları “hərtərəfli strateji tərəfdaşlıq” səviyyəsinə çatdırmağa çalışır”.
Nurlana Hacıyeva
