Zelenski hökuməti Ukrayna Silahlı Qüvvələrinin əks-hücum taktikasını açıqlayıb.
Ukrayna Prezident administrasiyanın müşaviri Mixaylo Podolyak ölkənin Silahlı Qüvvələrinin əks-hücum zamanı izlədiyi taktikalardan danışıb. O, bu barədə “FreedDom” telekanalının efirində söhbət açıb.
Podolyak vurğulayıb ki, Ukrayna qoşunları müxtəlif istiqamətlərdə atəşin intensivliyini tədricən artırır. Bundan əlavə, əməliyyat formalaşacaq, hücumların sayı da artacaq.
İyunun 10-da Ukrayna prezidenti Vladimir Zelenski ölkənin silahlı qüvvələrinin artıq əks-hücum əməliyyatı keçirdiyini təsdiqləyib. O, hərəkətlərin təfərrüatlarını açıqlamayıb, lakin qeyd edib ki, “bunun hamıya təsiri olacaq”.
Əks-hücum taktikası Ukraynaya nə verəcək? Əgər Ukrayna müsbət irəliləyiş əldə edə bilərsə, hansı mühüm addımları ata bilər? Zelenski niyə bu cür addım atmaq qərarına gəlib?
Britaniyalı jurnalist və politoloq Neil Watson Ednews-a açıqlamasında diqqətlə hazırlanmış əks-hücumun, şübhəsiz ki, təsirli ola biləcəyinə inandığını vurğulayıb:
“Birincisi, bu o deməkdir ki, Rusiya qüvvələri 1000 km-lik cəbhə xətti boyunca eyni vaxtda bir neçə istiqamətə çəkiləcək. Ukrayna qüvvələri rusiyalı çağırışçıların saxladığı və ya Rusiya qüvvələrinin zəif olduğu ərazilərə diqqət yetirə bilər. Onlar rus ordusunu bütün cəbhələrdə sıxışdıracaqlar və bununla da istər-istəməz rus komandirləri səhvlərə yol verəcək. Ən peşəkar rus əsgərlərinin saxlanıldığı və Rusiya Hərbi Hava Qüvvələri tərəfindən qorunduğu Cənubda ən böyük problem yaşanacaq”.
Onun sözlərinə görə, Ukrayna ordusunda ciddi şəkildə hava hücumundan müdafiə sistemi demək olar ki yoxdur, lakin ruslar böyük təzyiq altında qalacaq və ən son silahlarını, məsələn, sürüşmə bombalarını yerləşdirməyi düşünməli olacaqlar:
“Bütün bunlar Rusiya qüvvələrinin, xüsusən də gənc çağırışçıların mənəviyyatına da təsir edəcək. İnanıram ki, Zelenski əsasən də hərbi xidmətə çağırış və Donetsk ətrafında və cənubda Ukraynanın uğurları nəticəsində Rusiyada müharibəyə dəstəyin azaldığını görür:
“Bundan əlavə, o, yardım vədləri aldığı Avropa ölkələrinə səfərindən sonra bu cür qənaətə gəlib. Mən əminəm ki, bu strategiya ilə bağlı Avropa liderləri ilə məsləhətləşiblər. İnanıram ki, Zelenski rus qüvvələrinə son dərəcə meydan oxuduğunu deyir. Onun əks-hücum qoşunları indiyədək tam yerləşdirilməyib. Onlardan strateji məqsədlər üçün istifadə olunur və mən müəyyən dərəcədə baş verəcək irəliləyişlərə nikbin baxıram”, - deyə N.Vatson yekunda qeyd edib.
Ülviyyə Şahin
.jpg)
