Bu gün Ednews saytının baş redaktoru, jurnalist Vüsalə Balayevanın doğum günüdür. Bu münasibətlə həmkarımızı, iş yoldaşımızı təbrik edir, işlərində uğurlar arzulayır və onunla ad günü müsahibəsini təqdim edirik:
- Sizcə, insanın yaşını yaşadıqları göstərir?
- Məncə, hər bir insanın üzündə yaşadıqları əks olunur, qırışlarla, gözlərinin dərinliklərində gizlənən kədərlə. Bəzi insanlar var ki, deyir, gülür, amma onların diqqətlə gözlərinə fikir versəniz, gözlərində bir qəm hiss olunar. Ataların bir sözü var, ağ gün adamı ağardar, qara gün adamı qaraldar. Xanım tanışım vardı, hardasa 10 il idi ki, onu görmürdüm. Sonra bir dəfə gördüm, anama dedim ki, filankəsin rəngi niyə qaralıb, o, əvvəl elə deyildi. Anam qadının 10 ildə nələr yaşadıqlarını danışdı. Düşündüm ki, ataların sözü onun simasında özünü tapmışdı.
- Ad günləri sizin üçün nə qədər əhəmiyyətlidir? Xüsusi bir özəlliyi varmı?
- Əslində ad günlərimdə özümü xüsusi hiss etməmişəm. Uşaq olandan bu belədir. Qızım 1 ay əvvəldən ad gününü düşünür, ona hansı hədiyyə alacağımızın xəyalını qurur. Ad günü adi günlər kimi keçib mənim üçün.
- Uşaq vaxtı həyəcanla gözləməmisiniz ki, axşam atam evə gələndə hədiyyə gətirəcək...
- Hədiyyə gözləmişəm. Atam, onsuz da məni ərköyün böyüdüb. İstədiyim hər şey qarşımda olub. Bəlkə də hədiyyələri çox almışam deyə bu hal adiləşib. Anam bağça müəlliməsi işləyib. Yadımdadır, uşaq olanda anam məni məktəbə qədər iş yerinə aparırdı. O bağçada yetim, kiməsiz, ailəsi tərəfindən tərk edilən uşaqlar tərbiyə alırdı. O uşaqlara birgə oynayırdıq. Çox acı taleli uşaqlar vardı. O vaxtlar bunları başa düşmürdüm. Anam danışardı sonralar o uşaqların hekayələrini. Anam hər maaşını alanda Maştağada böyük bir oyuncaq dükanından mənə oyuncaq alırdı. Atam da həmçinin. O, həmişə gələndə mənə hədiyyələr gətirirdi.
- Heç unuda bilmədiyiniz ad gününüz olub?
- Ad günümə az vaxt qalmış, xəbər gəldi ki, xalam dünyasını dəyişib. Ona anam deyirdim. O qədər əziz və doğma idi mənə. Həmin il ad günümdə bacımın toyu olacaqdı. Qara xəbər bütün planları dəyişdi. Hər bir şey təxirə düşdü. Həmin ad günümü qəmgin keçirtdim.
- Ad günlərinizdə bir arzu tutursunuzmu?
- Hər zaman. Təbiətcə ambisiyalı bir insanam. Ad günlərimin səhərində gələn il üçün nə istəyirəmsə qarşıma məqsəd qoyuram. İlk olaraq arzu olur, daha sonra isə arzumu məqsədimə çevirir və onun üzərində çalışıram. Çox vaxt da bu arzularımı reallaşdırıram.
- Baş redaktor kimi, Azərbaycan mediası haqda nələr düşünürsünüz?
- Arzu edirəm ki, jurnalistika sahəsində təzə addımlarını atan gənclər daha çox çalışsınlar. Bizim vaxtımızda jurnalistlər daha çalışqan idi, aramızda rəqabət vardı. Mənim baş redaktorum yazımı redaktə edəndə öz yazımı və redaktə edilmiş yazını müqayisə edir, bilmədiyimi soruşurdum. İndiki gənc jurnalistlər yazılarının redaktə olunmuş variantına baxmır. Bizim redaksiyaya BDU-dən, Xarici Dillər Universitetindən tələbələr praktika üçün gəlirlər. Bu şəraiti onlar üçün Beynəlxalq Avrasiya Mətbuat Fondu yaradır. Onların arasından yetişdirdiyimiz jurnalistlər də olub. Ki, bu gün onların bəziləri müxtəlif media orqanlarında çalışırlar.
Söhbətləşdi: Oğuz Ayvaz
