Nikol Paşinyan 10 noyabr 2020-ci il tarixli üçtərəfli bəyanatın 9-cu bəndini ləğv etməyə çalışır. Xatırladaq ki, Bəyanatın 9-cu bəndinə əsasən, Azərbaycanın qalan əraziləri ilə Naxçıvan arasında nəqliyyat kommunikasiyalarına Ermənistan ərazisində Rusiya Federal Təhlükəsizlik Xidməti nəzarət etməli idi.
Hazırda Ermənistan, əsasən Paşinyan hakimiyyətinin anti-Rusiya siyasi xətti ilə getdiyini heç kəsə sirr deyil. Baş nazir qərbyönümlü istiqamət alaraq, Rusiya ilə müttəfiqlik münasibətlərini məhv edir.
Rusiya Ermənistanın bu cür siyasəti necə dəyərləndirir? Qərb ölkələri nəyə görə narahatdır?
Məsələ ilə bağlı politoloq İlyas Hüseynov Ednews-a açıqlamasında bildirib ki, komunikasiya xətti üzərində rus əsgərlərinin dayanması Ermənistanın arxasında olan qüvvələri dərindən narahat edir:
“Ermənistanın baş naziri Nikol Paşinyan 10 noyabr 2020-ci ildə imzalanan bəyanatın 9-cu maddəsini inkar edərək faktiki olaraq ondan imtina edir. Ermənistanın bu cür siyasəti bilavasitə Rusiyanın regiondan sıxışdırılıb çıxarılması ilə bağlıdır və bunu Qərbin təlimatları ilə edir. Xüsusilə qeyd etmək lazımdır ki, üç tərəfli birgə bəyanatın 9-cu maddəsində göstərilir ki, nəqliyyat və komunikasiya sahəsində təhlükəsizliyi Rusiya təmin edəcəkdir və federal təhlükəsizlik qoşunları fəaliyyəti icra edəcəkdir.
Əlbəttə komunikasiya xətti üzərində rus əsgərlərinin dayanması Ermənistanın arxasında olan qüvvələri dərindən narahat edir. Çünki ticarət yolları,mal tədarükü və logistika fəaliyyətində rusların iştirakı Qərb üçün hazırki, qlobal reallıqlarda arzuolunmazdır.
Ona görədə Ermənistan özünü sifariş icraçısı kimi göstərməyə çalışır. Bu cür siyasi fəaliyyətlər Ermənistan üçün mənfi nəticələr doğura bilər.
Ermənistanda 102-ci rus hərbi bazası mövcuddur. Eyni zamanda Ermənistanın İran və Türkiyə ilə sərhədlərini rus əsgərləri qoruyur. Ermənistanda yerləşən bir çox havalimanında rus əsgərləri mövcuddur”.
Politoloqun fikrincə Ermənistan bu cür hərəkətlərlə əsrlərlə Cənubi Qafqazda var olan Rusiyaya qarşı strateji dirəniş göstərir. Bununla da o bütün regional reallığı bilə-bilə çox böyük səhv edir.
Xəyal Ramiz
