Qəzzada döyüşlər gücləndikcə Misirdə də gərginlik artır. 2013- cü ildən etibarən apolitik cəmiyyət formalaşdıran Misir hərbi hökümətinin səssizliyinə görünür gənc nəsil baş verənləri izləyirlər, zolağındakı rayon və kəndlərin adlarını öyrənib “sionistlərlə döyüşə getmək” arzusundadırlar. Görünür Misir Qəzzadan yaxın dönəmdə təsirlənə bilər.
Bəs Misir münaqişəyə qoşulacaqmı? Hansısa eskalasiya gözləməyə dəyərmi?
Politoloq Vüqar Zifəroğlu Ednews – a açıqlamasında baş verən son proseslərin münaqişənin böyük bir müharibəyə keçid edəcəyinin ilkin işartıları olduğunu vurğulayıb:
“Hazırda İsrail – Həmas arasında gedən bu mübarizənin, ilk gündən də qeyd edildiyi kimi, Fələstin – İsrail sərhədindən kənara çıxacağı ehtimalı çox böyükdür. Gedişat da onu göstərir. Sərhəd ölkələrindən təkcə Misirdə deyil, eyni zaman da İordaniyada müəyyən narazılıqlar mövcuddur və bir neçə gün əvvəl Yəmən İsrailə müharibə elan etdi, Livanda, Suriyada və İraqda müəyyən müzakirələr gedir. Bu da düşünürəm ki, regionda böyüməkdə olan münaqişənin böyük bir müharibəyə keçid edəcəyinin ilkin işartılarıdır. Burada ələxsüs atəşkəsin elan olunması və tərəflərin danışıqlar masasına oturması önəmli məsələdir”.
Misirin İsrail və Ərəb ölkələri arasında körpü rolunu oynadığını söyləyən politoloq, eyni zaman da vasitəçiliyə töhfə verə biləcək ölkə kimi Türkiyəni qeyd edib:
“Misir keçmiş prezident Hüsnü Mübarək dövründən başlayaraq hər zaman Ərəb ölkələri və İsrail arasında körpü funksiyasını icra edib. Bir çox danışıqlarda – 70 – ci illərin sonlarından başlayaraq aktiv rol oynayıb və danışıqların tənzimlənməsində müəyyən funksiyanı üstənib. Bu mənada indiki dövrdə Misirin bu proseslərdə həm məsafəli, həm də daxildən yanaşmasını müşahidə edirik. Buradan yola çıxaraq Misirin vasitəçi ola bilmə potensialını söyləyə bilərik. Lakin bu funksiyanı nə qədər üstənə biləcəyini söyləmək çətindir. Düşünürəm ki, mövcud qarşıdurmaya vasitəçi rolu kimi göstərilə biləcək ən böyük namizəd, ərazidə bir neçə əsrlik hökmranlığı olmuş Türkiyədir. Bütün bu ehtimallardan və formatlardan istifadə edərək danışıqlar masasına oturmaq olar. Ələxsus əsas məsələ bunu olduqca tez bir şəkildə etməkdir, hərçənd münaqişə geniş vüsət ala bilər”.
Əkbər Novruz
