Xəbər verdiyimiz kimi, Prezident İlham Əliyev bildirib ki, son 20 ildə Azərbaycan iqtisadiyyatına 310 milyard dollar sərmayə qoyulması ölkəmizdə münbit sərmayə iqliminin nəticəsidir.
Son 20 il ərzində Azərbaycan iqtisadiyyatına 310 milyard ABŞ dolları həcmində sərmayə qoyulub və bunun 200 milyard dolları qeyri-neft sektorunun payına düşür. Qeyri-neft sektorunda sözügedən inkişafın əsas istiqamətləri hansılardır?
Mövzü ilə bağlı iqtisadçı-professor Elşad Məmmədov Ednews-a açıqlamasında qeyd edib ki, Azərbaycan üçün xarici investisiyalar əsas iqtisadi amillərdən biridir:
“Sözsüz ki ölkədə investisiya həcminin artması iqtisadiyyatın əsas inkişafı nöqteyi nəzərdən təkan verici amil kimi çıxış edir. Biz son 10 il ərzində neft strategiyasına əsaslanan investisiya siyasətinin, eyni zamanda iqtisadiyyatın digər sahələrində də öz multikupliyativ effektini gördük.
Çünki iqtisadiyyatda məlumdur ki, əlaqəlilik prinsipi yüksək səviyədə olur. Yəni bir sahəyə edilən investisiya digər sahələrdə də zəncirvari inkişafa səbəb olur.
Hal-hazırda respublikamızda əsas avadanlıq, texniki xidmət çeşidləri, metal işləri, nəqliyyat xidmətləri, qida və xəstəxana xidmətləri, kimya və neft-kimya sənayesi də daxil olmaqla neft və qaz sənayesini təchiz edən sahələrdə artım potensialı mövcuddur.
Azərbaycanda neft sektoruna yatırılan investisiyaların qeyri-neft sektoruna olan təsirini ölkənin Ümumi Daxili Məhsulunda qeyri-neft payı nisbəti üzərindən yüksək göstəriciləri görmək mümkündür”.
İqtisadçı qeyri-neft sektorunda olan inkişafın dayanıqlığı və sistemliliyi üçün bir neçə alternativlər söyləyib:
“Əsas olaraq ölkədə daxili özəl investisiya instutlarının və resurslarının inkişafına ehtiyyac var. Çünki biz görürük ki, hazırda investisiyaların böyük hissəsi dövlət tərəfindən və ya xarici şirkətlərin sərmayələrinə əsaslanır.
Bu da problemlərin həllinə lazımi şərait yaratmır.
Digər tərəfdən artan istehsalın ixracı üçün genişlənən bazarlar tələb olunur.
Eyni zamanda qeyri-neft sektorunun inkişaf etdirilməsi bazar konyukturunda baş verən dəyişikliklərdən milli iqtisadiyyatın sığortalanması məqsədilə alternativ variantların reallıqda tətbiqini özündə əks etdirir.
Həmçinin regional iqtisadi inkişafın dərinləşməsidə zəruridir ki, ölkədə qeyri-neft sektoru inkişaf üçün impuls və stimul almış olsun”.
Xəyal Ramiz
