Aleksey Navalninin ölümü sözsüz ki, bütün dünyada böyük bir səs-küyə səbəb oldu. Fərqli bir sıra mülahizələr ortaya atıldı, lakin hələlik yekun qərar yoxdur.
Bəs Azərbaycan siyasətçiləri bu hadisə ilə bağlı nə düşünürlər?
Ednews partiya sədrləri və deputatlar arasında sorğu keçirib:
Ağ Partiyanın sədri Tural Abbaslı:
“Bu hadisə təbii ki, Rusiyanın yaxın gələcəyinə neqativ anlamda təsir edəcək hadisələrdən biridir. Ona görə ki, son illərə baxdığımızda görə bilirik ki, Rusiya cəmiyyətində Putinə alternativ yetişdirməkdə xeyli geriləmələr var. Hərçənd Navalni dünya səviyyəsində tanınmış, Putin əleyhdarı bir daxili müxalif bir lider idi. Onun ölümü Rusiyanın demokratiya yolunda inkişafını xeyli ləngidəcək. Hazırda hadisənin hansı yolla baş verdiyini zaman göstərəcək. Lakin Putinin necə bir lider olduğunu və idarəetmə metodunu bilən hər kəs bilir ki, bu təsadüf olmaya bilər. Hər-halda bu demokratiyaya böyük zərbədir. Boris Nemtsov, Aleksey Navalni kimi bir sıra liderlərin ölümü ilə birlikdə, hazırda da potensial liderlərin qıtlığı var. Artıq əks – düşüncəni toplayacaq bir şəxs yoxdur”.
Azərbaycan Demokrat Partiyasının sədri Sərdar Cəlaloğlu:
“Navalninin bu ölümü Rusiyada ilk siyasi xarakterli qətl deyil. Buna kimi Putinə qarşı çıxan müxalif olan iş adamları, xüsusi orqanların əməkdaşları dünyanın hansı hissəsində olmalarından aslı olmayaraq öldürülüb. Bu muasir Rusiya üçün çox xarakteristik bir hadisədir. Təbii ki, Navalni Putinə qarşı müxalifətin başında duran əsas həlledici liderlərdən biri və bir simvol idi. Onun çıxışları, çağırışları vasitəsilə Rusiyanın müxtəlif şəhərlərində kütləvi aksiyalar keçirilirdi. Bu proses də gün keçdikcə daha da inkişaf edirdi və Rusiyada qarşıdan gələn prezident seçkilərinə təsir etmək imkanı var idi. Ona görə də mən bunu bir siyasi qətl hadisəsi olaraq hesab edirəm. Onun nəşinin verilməməsi və ya hadisə ətrafında məlumatların dumanlı şəkildə verilməsi bunun bir qətl olduğunu göstərir. Təbii ki, burada düşünürəm, əsas məqsəd prezident seçkiləri qabağı baş verə biləcək potensial ümumxalq aksiyasının qarşısını almaq idi. Hesab edirəm ki, Navalnidən sonra onun kimi Putinə qarşı çıxa biləcək daha ciddi bir lider, onun və ondan əvvəlki liderlərin ölümü ilə birlikdə Rusiyada müəyyən demokratik ictimaiyyətin ayağa qalxmasına gətirib çıxaracaq. Çox təəssüf ki, Rusiyada totalitar bir təfəkkür hökm sürür. Orada insanların həddindən artıq içkiyə aluda olması, apolitik olması, demokraitikaya böyük bir əngəl yaradır. Nəticə olaraq onu deyə bilərəm ki, bu Qərbin də yaxından dəstəyilə çox güman ki, elə Navalnin qətlində günahkar bilinən şəxslər cəzalandırılacaq və Rusiya demokratikləşəcəkdir”.
Milli Cəbhə partiyasının sədri və deputat Razi Nurullayev:
“Aleksey Navalninin ölümü ətrafında bir sıra ciddi mülahizələr ortaya atılır. Fakt isə dəyişmir, o, artıq yoxdur. O, Rusiya vətəndaşlarını ətrafında cəmləyə bilmək, siyasi prosesləri idarə etmək və ölkədə hakimiyyət dəyişikliyi naminə çox çalışdı. Bu yolda deyərdim ki, çox risklər götürdü, az sayda insanların təriflərindən başı bir növ gicəlləndi və bu da onun reallıq hissini itirməyə səbəb oldu. Bununla da o, öz həyatı ilə ödəmiş oldu. Onun ölümünə çox üzülürəm. Qorxmaz və çox bacarıqlı bir siyasətçi idi. Onun ölümü həm də bir dərsdir. Rusiya prezidentinin ölkəsində reytinqi yüksəkdir və hərçənd, xalq onu istəməsə o, hakimiyyətdə qala bilməz. Reallıq budur ki, o, ən azından 50% üzərində səs toplaya bilir. Onun üçün də real vəziyyətdən və siyasətdən uzaq düşmək lazım deyil. Əgər kütləvi dəstək yoxdursa odun içinə getmək yanlış addımdır. Siyasət mümkün olanı həyata keçirməkdir. Hansı siyasətçi mümkün olandan artığını etmək istəyirsə sıfır nəticəyə nail olur. Sonda bir daha Aleksey Navalninin ölümündən kədərləndiyimi vurğulamaq istəyirəm”.
Əkbər Novruz