BMT-nin Azərbaycandakı rezident koordinatoru ofisinin rəhbəri Kanako Mabuçi deyib ki, COP29-da iqlim dəyişikliyi ilə mübarizəyə ayrılan vəsaitin artırılması haqqında qərar qəbul oluna bilər.

O qeyd edib ki, COP29 əslində sadəcə bir konfrans deyil, bir prosesdir və builki tədbirdən bəzi nəticələr gözlənilir: “Bunlardan biri maliyyə məsələsidir. Belə ki, 2015-ci ildə Paris Sazişini imzalayan tərəflər üzərinə belə bir öhdəlik götürdü ki, hər il bu sahəyə ayrılacaq vəsait 100 milyard ABŞ dolları həcmində olacaq. COP29-da bu rəqəmə yenidən baxılacaq və düşünürük bu rəqəm artırılacaq. Baxmayaraq ki, Azərbaycan bu tədbirə ev sahibliyi edir qərar bütün iştirakçılar tərəfindən veriləcək",- deyə o bildirib.

Mövzu ilə bağlı iqtisadçı-ekspert Natiq Cəfərli Ednews-a açıqlamasında bildirib ki, iqlim dəyişiklikləri ilə mübarizə üçün milyardlarla vəsaitə ehtiyac var. Lakin bunun hansı formula ilə maliyyələşdirilməsi dəqiq deyil.

Natiq Cəfərli qeyd edib ki, hazırda iqlim dəyişikliyi ilə bağlı, böyük maliyyə vəsaitinə ehtiyac var və Bakıda baş tutacaq noyabr ayındakı konfransda iqlim dəyişikliyi ilə mübarizənin maliyyələşdirilməsi ilə bağlı qərar verilə bilər:

“O qərar hansı yöndə olacaq, nə qədər vəsait ayırılacaq, hansı donor ölkələr bununla bağlı qərar verəcək- bu konfransın gedişində məlum olacaq. Amma iqlim dəyişiklikləri ilə mübarizə üçün milyardlarla vəsaitə ehtiyac var. Bunu bütün mütəxəssislər deyir. Bunun hansı formula ilə maliyyələşdirilməsi dəqiq deyil. Ona görə bu konfransdakı əsas məsələlərdən biri bu maliyyə mənbələrinin tapılması, donorların müəyyənləşdirilməsi yönündə olacaq”.

Xəyal Ramiz