Bakı ilə Qahirə arasında birbaşa aviareyslərin açılması Azərbaycan və Misir arasında turist axınının artmasına töhfə verəcək.
Ednews xəbər verir ki, bunu Azərbaycanın Misirdəki səfiri Elxan Poluxov Misirin "Əl-Əhram" qəzetinə müsahibəsində deyib.
“Təəssüflər olsun ki, 2023-cü ilin son statistikasına görə, Misirə 17 minə yaxın Azərbaycan vətəndaşı, Azərbaycana isə 7 minə yaxın Misir vətəndaşı səfər edib. Şarm Əl-Şeyxdən Bakıya birbaşa uçuşumuz var. İnanırıq ki, Qahirədən Bakıya birbaşa reysin olması, şübhəsiz ki, turistlərin sayını artıracaq”, - o bildirib.
Səfir qeyd edib ki, hər iki ölkənin dərin, zəngin tarixə və gözəl təbiətə malik olması onları səyahətçilər üçün cəlbedici edir:
“Bundan əlavə, turistlər də bizim mətbəximizdən zövq ala bilərlər”.
Onun sözlərinə görə, Misir və Azərbaycan müxtəlif beynəlxalq mədəni, musiqi və idman tədbirlərinə ev sahibliyi etməyi də nəzərdən keçirə bilər: “Ötən il Qahirə Opera Teatrında Heydər Əliyevin 100 illik yubileyinə həsr edilmiş konsert təşkil olundu. Ümummilli Liderin xatirəsinə həsr olunmuş iki ölkənin komandaları arasında ilk kikboksinq turnirini də təşkil etdik. Bu il daha bir konsert və digər mədəni tədbirlər keçirməyi planlaşdırırıq”.
"2023-cü ilin yanvarında Prezident Əbdülfəttah əs-Sisi Azərbaycana, bu yaxınlarda isə Prezident İlham Əliyev ikinci dəfə Misirə səfər edib. Bu, onu göstərir ki, hər iki ölkə ikitərəfli münasibətlərdə yeni, unikal səhifə açır”, – o vurğulayıb.
Səfirin sözlərinə görə, Prezident İlham Əliyevin Misirə son səfəri Yaxın Şərq və Cənubi Qafqaz üçün regional əhəmiyyət kəsb edib:
“Azərbaycan və Misir dünyanın və regionlarının aparıcı dövlətləridir. Hər iki ölkənin oxşar keçmişi var. Qoşulmama Hərəkatı, İslam Əməkdaşlıq Təşkilatı və digər beynəlxalq təşkilatlar çərçivəsində əməkdaşlığımız göstərir ki, biz regional və qlobal səviyyədə problemləri tam başa düşürük”.
Səfir Azərbaycanda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) keçirilməsinə də münasibət bildirib. O xatırladıb ki, Prezident İlham Əliyev Misir dövlət başçısını bu ilin noyabrında keçiriləcək COP29-a dəvət edib.
