“Ərdoğan İsveç və Finlandiyaya qarşı düzgün reaksiya nümayiş etdirir”.
Bu fikri Ednews-a siyasi elm və beynəlxalq münasibətlər üzrə ekspert Can Kakışım İsveç və Finlandiya xarici işlər nazirlərinin Türkiyəyə səfərinə münasibət bildirərkən deyib.
Ekspertin fikrincə, Türkiyə prezidenti bir müddət sonra mövqeyini dəyişə bilər:
“İsveç və Finlandiyanın terrorla mübarizədə Türkiyəyə dəstək vermədiyi və anlayış göstərmədiyi açıq-aydın ortadadır. Türkiyə prezidenti Ərdoğan da fürsət tapan kimi bunu dilə gətirir. Bu da düzgün reaksiyadır. Lakin Ərdoğan xarici siyasətdə bu münasibəti davamlı sərgiləməyəcək. Biz bunu bir neçə dəfə müşahidə etmişik. Türkiyə prezidentinin dəyişkən xarici siyasət nümayiş etdirdiyinin şahidi olmuşuq. İsveç və Finlandiyadan gələn heyətlərin təkliflərinin Türkiyə rəhbərliyi üçün bir mənası olmayacaq. Ərdoğan yalnızca Baydenin bu sahədəki təklifini və xahişini əsas götürə bilər”.
Qeyd edək ki, Türkiyə prezidenti Rəcəb Tayyib Ərdoğan İsveç və Finlandiyanın NATO-ya üzvlüyünə razı olmayacağını bildirib. Bu səbəbdən İsveçin xarici işlər naziri Ann Linde və Finlandiyanın xarici işlər naziri Pekka Haavisto NATO-ya üzvlük müraciətlərini müzakirə etmək üçün Türkiyəyə səfər edəcək.
Xanlar Əlibəy