Son iki gündə Ukraynada benzin və dizel qiymətləri 22-30% bahalaşıb. Buna səbəb isə ölkədə yanacaq enerjisinə yaranan qıtlıqdır. Məlumata görə, Aİ-92 markalı benzin 8,93 qrivnadan 48-49 qrivnaya, Aİ-95 isə 11-12 qrivnadan 51-51 qrivnaya yüksəlib. Dizel 56,49 qrivna, maye qazın pərakəndə satışı isə 39,24 qrivna qədər bahalaşıb.
Ukrayna yanacaqla Rusiyadan təmin edildiyi üçün, müharibə səbəbilə ölkə bu sahədə böyük maneələrlə rastlaşıb.
Ukraynada hökm sürən enerji qıtlığı ilə bağlı vəziyyəti şərh edərkən Ednews-a açıqlaması zamanı iqtisadçı Pərviz Heydərov bildirib ki, Avropa ölkələri Rusiyanın enerji daşıyıcılarından elə asılı vəziyyətdədir ki, bundan yaxa qurtarmaq mümkün deyil. Bununla yanaşı o, qeyd edib ki, Rusiya ilə enerji əlaqələrində radikal qərar Avropa ölkələrin iqtisadiyyatı üçün böyük bir fəlakət ola bilər.
Ukraynanın alternativ ölkə tərəfindən enerji daşıyıcıları ilə təmin olunmasına gəlincə isə P.Heydərov bildirib ki, Ukrayna Avropa İttifaqından əlini üzməlidir.
“Ağır olsa da bunu etiraf etmək lazımdır ki, Ukraynanın yeganə xilas yolu Rusiya ilə müharibəni dayandırmaqdır. Əlbəttə, hazırda bu mümkün deyil”.
İqtisadçının fikrincə, Azərbaycan Ukraynanı yanacaqla təmin edə bilər. Lakin...
“Azərbaycanı yanacaq təminində Ukrayna üçün alternativ ölkə kimi görmək mümkündür. Lakin Ukraynada qanlı müharibənin getdiyini nəzərə alsaq burada təhlükəsiziliyin təmin olunmasının mühüm olduğunu görərik. Belə olan halda Ukrayna Azərbaycan üçün təhlükəsizliyə tam zəmanət verməlidir. Bu isə baş verən hadisələrin fonunda demək olar ki, mümkünsüzdür. Avropanın başı öz hayına qarışdığı vaxtda Ukraynanın kimdənsə kömək diləməsi əbəsdir”.
Yunis Abdullayev