Sülh müqaviləsinin ilkin mətninin hazırlanmalı olduğu bir vaxtda Ermənistan sentyabrın 12-də Azərbaycan-Ermənistan sərhədinin Laçın, Kəlbəcər və Zəngilan rayonları istiqamətində genişmiqyaslı təxribata əl atdı.
Ednews xəbər verir ki, uzun müddət idi ki, Ermənistan beynəlxalq aləmdə Azərbaycana qarşı kampaniya aparır, sülh danışıqlarını, kommunikasiyaların açılmasını, ümumilikdə regionda təhlükəsizliyin təmin olunması istiqamətində irəli sürülən bütün təşəbbüsləri pozurdu. Bu ölkə müharibənin başa çatmasından 2 ilə yaxın vaxt keçməsinə baxmayaraq, hələ də 2020-ci il noyabrın 10-da imzalanmış üçtərəfli bəyanatın müddəalarını icra etmir. Son genişmiqyaslı təxribatla başlanan gərginlik revanşist siyasətin, mövcud vəziyyəti öz xeyrinə dəyişdirmək cəhdinin nəticəsidir. Bu, ilk növbədə cinayətdir. Baş vermiş təxribat nəticəsində hərbi qulluqçularımız şəhid oldu, hərbi və mülki infrastruktura ziyan dəydi. Eyni zamanda xidməti vəzifələrini yerinə yetirən mülki insanlar da yaralandı. Belə ki, Ermənistan silahlı qüvvələrinin bölmələri tərəfindən açılan atəş nəticəsində Kəlbəcər rayonu ərazisində heyvandarlıqla məşğul olan Goranboy rayonunun Veyisli kəndində yaşayan Kəlbəcər rayonu Bozlu kənd sakini 1975-ci il təvəllüdlü Musayev Asim İsa oğlu və Goranboy rayonunun Qaraçinar kəndində yaşayan Kəlbəcər rayonu Ağdaban kənd sakini 1984-cü il təvəllüdlü Orucov Arzuman İman oğlu yaralandılar. Ermənistan bu dəfə də terrorçu xislətini gizlədə bilməyib, sivilləri hədəf aldı. Eyni zamanda Ermənistan silahlı qüvvələrinin diversiya qruplarının xüsusilə də qaranlıq hava şəraitində ərazinin dağlıq relyefi və mövcud dərə boşluqlarını istifadə edərək müxtəlif istiqamətlərdə Azərbaycan ərazilərinin, xüsusilə geniş bərpa-quruculuq işlərinin aparıldığı yerlərin, təminat yollarının minalamaqla regionda yeni təhlükəyə yol açdı. Bu, onlarla, yüzlərlə insanın ölümünə səbəb olacaq bir cinayətdir. Təsadüfi deyil ki, son 30 ildə 3190 nəfər Azərbaycan vətəndaşı, o cümlədən 355 uşaq, 38 qadın mina qurbanı olub. Ən dəhşətlisi isə budur ki, müharibə başa çatdıqdan sonra sülh prosesi vaxtı 2020-ci ilin noyabr ayından 2022-ci ilin sentyabr ayınadək 242 nəfər mina qurbanı olub. Üstəlik, bu minaların məhz 2021-ci il istehsalı olduğu aşkarlanıb. Yəni, faktiki Ermənistan sülh danışıqları masasında humanitar məsələlərlə bağlı götürdüyü öhdəlikləri nəinki icra etmir, əksinə müharibə cinayətlərinin miqyasını daha da artırmaqdadır. Görünən budur ki, Ermənistan sülh gündəliyinin əleyhinə çıxaraq kommunikasiyaların və nəqliyyat marşrutlarının açılmasında maraqlı deyil. Bu isə rəsmi İrəvanın bütövlükdə sülh prosesində maraqlı olmadığını göstərir.
Təsadüfi deyil ki, İkinci Qarabağ müharibəsi zamanı və post-münaqişə dövründə Ermənistan silahlı qüvvələri tərəfindən yüzlərlə insanın hüquqları pozulur. Mülki şəxslər və mülki yaşayış məntəqələri Ermənistan silahlı qüvvələri tərəfindən qəsdən hədəfə alınır, insan hüquq və azadlıqları kobud şəkildə pozulur və bu gün də mina terroru fonunda bu proses davam edir. Müharibə dövründə bəzi ölkələrin ombudsmanları Ermənistan tərəfindən törədilən insan hüquq pozuntularının yerində araşdırılması məqsədilə ölkəmizə səfər edib, daha sonra araşdırmanın nəticəsi olaraq əsaslandırılmış hesabat hazırlayaraq dünya ictimaiyyətini məlumatlandırıb.
Ermənistan bu davranışlarla beynəlxalq humanitar hüquq normalarına zidd olaraq, Azərbaycana qarşı etnik nifrət və düşmənçilik niyyəti sərgiləyir.
Azərbaycanın beynəlxalq səviyyədə tanınmış ərazilərini minalarla çirkləndirən Ermənistanın əsas niyyəti azad edilmiş ərazilərdə aparılan geniş bərpa-quruculuq işlərini və keçmiş məcburi köçkünlərin öz doğma yurdlarına geri qayıtmalarının qarşısını almaqdır. Ermənistanın bu təxribat əməlləri beynəlxalq ictimaiyyət tərəfindən sərt şəkildə qınanmalıdır. Günahsız insanların həlak olması ilə nəticələnən və regionda sülhün təmininə ciddi təhdid olan təxribat əməllərinə qarşı hüquqi təsir tədbirləri görülməlidir.
