Xəbər verdiyimiz kimi bu gün yəhudi ekspert Arye Qut dünyasını dəyişib. O uzun müddətdir ki  xərçəng xəstəliyindən əziyyət çəkib. 

Siyasi analitik, politoloq  Ramiyə Məmmədova Arye Qut haqqında öz fikirlərini Ednews-la bölüşüb:

“Biz Arye Qutla təkcə dost deyildik. Biz həmçinin bir-birimizlə sirdaş idik.  Ayrı yerlərdə yaşamağımıza baxmayaraq, telefonla hər zaman əlaqə saxlayıb bir- birimizə dəstək olurduq. Son zamanlarda  Aryenin xəstəliyi ilə bağlı əlaqələrimiz azalmışdı. Arye həmişə Bakıya gəlmədən öncə xəbərləşirdik. Mütləq şəkildə biz həmişə görüşürdük. O mənim  həm də qrup yoldaşım olub. Biz 1993-cü ildə  Qərb Universitetində  Beynəlxalq münasibətlər  və iqtisadiyyat fakültəsində təhsil almışıq.  Arye Qut elə o zamandan  böyük ürəyə sahib idi”.

R.Məmmədova qeyd edib ki, ali məktəbi bitirdikdən sonra, hərə bir yerdə çalışmağa başladı, bir müddət əlaqələrimiz itdi.

“Arye o zamanlar Aztv-də ingilis dilində  proqram aparırdı. Yadımdadır, Qismət belə gətirdi ki, biz Arye Qutla bir müddət sora yenidən görüşdük və birlikdə çalışmağa başladıq.  Bizim birgə  layihələrimiz, məqalələrimiz, konfranslarda çıxışlarımız oldu.  Hətta bəzi yerlərə bizi birgə dəvət edirdilər. Arye mənim qəlbimdə hər zaman yaşayacaq. Mən bu gün onun ailəsi ilə əlaqə saxladım. Çox təəssüf edirəm ki, mən onun son günlərində onunla danışa bilmədim. Çünki özünü yaxşı hiss etmirdi. Ona zəng vuranda mənimlə əlaqə saxlayacağını bildirdi. Aryenin ölümü  Azərbaycan üçün böyük itkidir. Azərbaycan Arye Qut kimi  vətənpərvər oğlunu itirdi”. 

 Ramiyə Məmmədova həmçinin insanların Arye Qutu bu cür yad etdiklərinə görə təşəkkürünü bildirib. 

“Bu gün bizi tanıyan insanlar Arye Quta görə mənimlə əlaqə saxlayıb baş sağlığı verirdilər. Bu mənim üçün həqiqətən böyük şərəf idi. Bizim dostluğumuz  mən yaşadıqca yaşayacaq. Buna görə mən insanlara Arye Qutu yad etdiklərinə görə çox sağ ol deyirəm”.