Xəbər verdiyimiz kimi oktyabrın 3-də rəsmi Bakı Fransaya etiraz notası verib. Sənəddə Azərbaycan Fransa hökumətindən təzminat tələb edir.

Sənəddə qeyd olunur ki, Fransanın səlahiyyətli qurumları tərəfindən bu ölkənin ərazisində yerləşən Azərbaycanın diplomatik nümayindəliklərinin və Azərbaycan Mərkəzinin mühafizəsinin lazimi qaydada təşkil edilməməsi, zorakılıq aktların hələ araşdırılmaması və təqsirkar şəxslərin məsuliyyətə cəlb edilməməsi ciddi şəkildə pislənilib və bütün bu hadisələrə görə müvafiq təzminat tələb olunub.

Beynəlxalq hüquq üzrə ekspertlər Azərbaycanın bu məsələdə haqlı tərəf olduğunu qeyd ediblər.

Ednews mövzu ilə bağlı hüquqşünasların fikirlərini öyrənib. Cavabları təqdim edirik.

Beynəlxalq hüquq üzrə ekspert Əlövsət Allahverdiyev açıqlamasında qeyd edib ki, Fransada Azərbaycan səfirliyinin təhlükəsizliyinin təminatına etinasızlığa görə rəsmi Paris məsuliyyət daşıyır.

“Dövlətlərarası diplomatik əlaqələr haqqında 1961-ci ildə Vyana konvensiyası qəbul edilib. Hər bir dövlət bu konvensiyanın tələblərini yerinə yetirməlidir. Fransa öz ərazisində yerləşən hər bir dövlətin diplomatik nümayindəliyinin təhlükəsizliyinə, eyni zamanda səfirliyin inzibati binasına dəyən ziyanın aradan qaldırılmasına görə öhdəlik daşıyır. Əgər Fransanın səlahiyyətli qurumları tərəfindən səfirliklərin təhlükəsizliyinin qorunması, maddi və mənəvi ziyanın qarşısının alınması ilə bağlı ciddi tədbirlər görülmürsə, bu konvensiyanın tələblərinin pozulması deməkdir. Beynəlxalq hüququn normaları və prinsiplərinə bir dövlətin yox, bütün dövlətlərin prizmasından baxmaq lazımdır. Hər hansı dövlətin diplomatik nümayindəliyinə hücum və zorakı hərəkətlərin edilməsi beynəlxalq birliyin maraqlarına və manefelərinə zidd olan bir məsələ kimi dəyərləndirilməlidir. Azərbaycan təzminat tələb etməsə belə, Fransa konvensiyanın pozulmasına görə ciddi məsuliyyət daşıyır”.

Beynəlxalq hüquqi məsələlər üzrə tədqiqatçı Əsabəli Mustafayev isə hesab edir ki, Azərbaycan beynəlxalq təşkilatlarda bu məsələ ilə bağlı iddia qaldıra bilər.

“Öz diplomatik nümayəndəliyinin təhlükə altına düşməsi və bununla bağlı mühafizə tədbirlərin görülməməsinə görə, Azərbaycan Avropa Məhkəməsinə müraciət edə bilər, habelə BMT-nin müvafiq  strukturlarında məsələ də qaldırmaq səlahiyyəti var. Xatırladım ki, Vyana konvensiyasına əsasən hər bir dövlət öz ərazisində yerləşən səfirliklərin və konsulluqların mühafizəsində öhdəlik daşıyır. Fransada Azərbaycan səfirliyinə hücumlar artıq mütəmadi hala çevrilib. Əgər Fransa ölkəmizin diplomatik nümayindəliyinin təhlükəsizliyini təmin etmirsə, orada çalışan Azərbaycan vətəndaşlarının həyatına və sağlamlığına ziyan dəyirsə, bütün bunları nəzərə alaraq rəsmi Bakının bu ölkədən kompensasiya tələb etmək hüququ var. Vyana konvensiyasının 39-cu maddəsinə əsasən, Azərbaycan Fransadan öz diplomatik mülkiyyətinin təhlükəsizliyi və mühafizəsi ilə bağlı ciddi tədbirlərin görülməsini tələb edə bilər”. 

Yunis Abdullayev