Xəbər verdiyimiz kimi, İsrail ordusunun “Givati” briqadasının əsgərləri bir neçə gün öncə Qüdsün Köhnə Şəhər hissəsində yürüş zamanı erməni arxiyepiskopu və digər zəvvarlara tüpürüb.
İsrail ordusu hadisəni “qeyri-etik” adlandırıb və əsgərlərin intizam məhkəməsinə çıxarılacağını bildirib. Bunu da qeyd etməliyik ki, İsrail Vətən müharibəsi zamanı Türkiyə ilə bərabər Azərbaycana yaxından dəstək olan və Ermənistanı işğalçı ölkə kimi tanıyan ölkələrdən biri olub.
Məsələnin hansı zəmində baş verməsi ilə bağlı isə israilli hərbi analitik Baruk Leviev Ednews-a açıqlama verib.
“Hadisə ilə bağlı həmin ərazilərdə xidmət göstərmiş keçmiş hərbiçi olaraq onu deyə bilərəm ki, orada belə təxribatlar çox geniş vüsət alıb. Ora nəinki erməni, hətta xaricdən də insanlar gələrək həmin əsgərləri bu cür hərəkətlərə təhrik edirlər. Düşünürəm ki, əsgərlər növbəti belə hala artıq şəxsi münasibətlərindən dolayı bu cür cavab verməli olublar. Yəni mən bunu sadəcə ehtimal edirəm”.
Ekspert həmçinin hadisəni ermənilərin özlərini dünyada ən yazıq bir millət kimi göstərmək məqsədilə bu məsələni şişirtdiklərini vurğulayıb.
“Qeyd etdiyim kimi bu hərbi hissədə hər zaman əsgərlərə qarşı bu cür təxribatlar olub. Hesab edirəm bu dəfə ermənilər yəhudi əsgərlərinin bu hərəkətindən istifadə edərək, bunu özlərinə qarşı nifrət kimi qələmə veriblər. Hətta ilk dəfə bu məlumatı eşidəndə əsgərlərin əslən qafqazlı və azərbaycanlı olduqlarını sandım. Halbuki, hadisə ilə bağlı video çarxı izləyərkən əmin oldum ki, tüpürən əsgər 19 yaşlı əsl dindar bir yəhudi gəncidir”.
Elnur Ənvəroğlu