ABŞ-ın Rusiyaya yeni təyin olunmuş səfiri Linn Treysi yaxın günlərdə Moskvaya köçməyə hazırlaşır.
Bu barədə Dövlət Departamentinin mətbuat xidmətinin rəhbəri Ned Prays bildirərək qeyd edib ki, xanım Treysi Moskvada öz vəzifəsinin icrasına başlamağı səbirsizliklə gözləyir.
Qeyd edək ki, Linn Treysi bundan öncə səfir vəzifəsini İrəvanda icra edib və öz fəaliyyəti dövründə daim erməniləri yerli və ya yersiz, cani dildən müdafiə edib. Hazırda amerikalı diplomatın Rusiyada davam etdirəcəyi görəvi də məhz bu baxımdan suallar doğurub. Treysinin bundan sonrakı fəaliyyəti nəyi dəyişə bilər sualına gəlincə, Beynəlxalq Münasibətlər və Araşdırma Mərkəzinin rəhbəri politoloq Samir Hümbətov Ednews-a açıqlamasında belə deyib: “Linn Treysinin bundan əvvəl də Ermənistana səfir kimi təyin olunmasında erməni lobbisinin dəstəyi olub. O, xüsusilə öz ermənimeyilli siyasəti ilə ikinci Qarabağ müharibəsindəki “fədakarlıqları” ilə yadda qalıb. Onun bu dəfə də Rusiyaya səfir getməsində erməni lobbisinin təşəbbüsü olması istisna edilmir. Ola bilsin ki, xanım Treysi bu dəfə də öz lobbiçi tərəfdaşlarının məqsdlərini həyata keçirmək niyyətində olsun,” deyə, ekspert belə vurğulayıb.
S.Hümbətov bildirib ki, yeni səfir Cənubi Qafqazda ermənistanın leyhinə ABŞ-la Rusiyanın ortaq maraqlarını həyata keçirə bilsə də, onun bir lobbiyə görə ABŞ-Rusiya və ya Rusiya-Ermənistan siyasətinə bütünlükdə ciddi təsir göstərmək ehtimalı yoxdur. O, əlavə edib ki, Paşinyanın qərbmeyilli olması Rusiya üçün narahatedici amil olduğu halda, Linn Treysinin rəsmi Kremli öz mövqeyindən döndərə bilməsi qeyri mümkündür. Bu səbəbdən də xanım Treysi bəlkə də Rusiya-ABŞ münasibətlərində əvvəlki səfirdən fərqli olaraq, cüzi müsbət rol oynaya biləsə də bu tərəfləri, xüsusilə Cənubi Qafqaz məsələsində öz fikirlərindən döndərə bilməyəcək.
Elnur Ənvəroğlu