Son bir neçə ildə regionda və ondan kənarda olan ölkələr üçün strateji əhəmiyyətli olan Gürcüstanın diplomatiyada susqunluq nümayiş etdirməsi diqqət çəkib. Həmin dövlətlərdən biri hazırda Gürcüstanla eyni acını paylaşan və Rusiya ilə cəbhədə mübarizə aparan Ukraynadır. Bu baxımdan ötən gün Gürcüstan prezidenti Salomi Zurabaşvilinin işğala məruz qalan Ukrayna və oxşar taleyi yaşayan Osetiya və Abxaziya ilə bağlı açıqlaması maraqla qarşılanıb. 

“Ukrayna ilə sülh sazişi çərçivəsində Rusiya qoşunlarını Abxaziya və Osetiyadan çıxarmalıdır.”

Ukraynalı politoloq Vadim Tryuxanın fikrincə, bu həm də Gürcüstanın artıq Ukraynanın qələbəsinə inamından irəli gəlir. Yəni Gürcüstan güclü olanın tərəfindən çıxış etməklə, proselərə ilk dəfə olaraq belə münasibət bildirib. Lakin ekspert Gürcüstanın bu qədər müddətcə proseslərə susqun qalmasını Ednews-a açıqlamasında belə qiymətləndirib: 

“Hər şey bu qədər sadədir. Saakaşvili parlament seçkilərində uduzduqdan sonra on ildən artıqdır ki, orada hökumətə milyarder Bdjina İvanişvilinin himayə etdiyi rusiyayönlü eqo siyasətçilər rəhbərlik edir.

Saakaşvilinin bəzi yoldaşları həbs edilib, bəziləri də ələ alınıb. Nəticədə müxalifət çox zəifləyib. Ona görə də rəsmi Tbilisi bu son açıqlamasına qədər uzun zamandır ki, susub”.

Ukraynanın Gürcüstanı özünə diplomatiyada mütttəfiq hesab edib-etməməsinə gəlincə, politoloq bildirib ki, bu məsələyə birmənalı münasibət bildirmək mümkün deyil. 

“Bu məsələyə münasibət bildirmək o qədər də asan deyil. Aydındır ki, rusiyalı milyarder İvanişvilinin himayə etdiyi indiki hökuməti etibarlı tərəfdaş hesab etmək olmaz. Eyni zamanda gürcü xalqı Ukraynaya rəğbətini və dəstəyini ifadə edir və ehtiyacı olan ukraynalılara humanitar yardım göstərir. Bundan başqa, çoxlu gürcü könüllüləri Ukrayna qəhrəmanları ilə çiyin-çiyinə cəbhədə rus qüvvələrinə qarşı döyüşürlər. 

Bu o deməkdir ki, vəziyyət olduqca tez dəyişə bilər. Gürcüstan gələcəkdə mütləq Ukraynanın tərəfdaşı olacaq. Çünki Aİ və NATO-da bizim ümumi gələcəyimiz var,” deyə, o, belə vurğulayıb.

Vadim Tryuxan həmçinin öz vətəni olan Gürcüstanda maddi və mənəvi işgəncə alan keçmiş prezident Mixayıl Saakaşvilinin son vəziyyəti ilə bağlı danışlb. O, qeyd edib ki, Ukrayna nəinki Saakaşvili, onun kimi  Gürcüstanda təziqə məruz qalanların azad edilməsi üçün səy göstərir. 

“Ukrayna xaricdə əziyyət çəkən bütün vətəndaşlarını azad etmək üçün əlindən gələni edir. Saakaşvili unikal hadisə deyil.

Dünən Ukrayna prezidenti Zelenski Kiyevdə Avstriya prezidenti ilə birgə mətbuat konfransı zamanı Gürcüstan hökumətini açıq şəkildə Saakaşvilini azad etməyə çağırıb. Bundan başqa, Ukrayna tərəfi bu istiqamətdə fəaliyyətini xarici tərəfdaşlarımızla əlaqələndirir.

Ümidvaram ki, prezident Saakaşvili tezliklə azadlığa çıxacaq, Ukraynaya və ya öz seçimi ilə istənilən Avropa dövlətinə dəvət əsasında gedə biləcək”. 

Elnur Ənvəroğlu