Xəbər verdiyimiz kimi, fevralın 6-da baş vermiş dağıdıcı zəlzələ Türkiyənin 10 vilayətində 13,5 milyon insana təsir göstərib. Zəlzələ bölgəsinə 65 ölkədən yardımlar göndərilib. Bir çox insan zəlzələdən zərər çəkənlərə kömək etmək üçün hərəkətə keçib. Dünyanın müxtəlif ölkələrindən zəlzələ qurbanlarına yardım kampaniyası həyata keçirilir.
Azərbaycan siyasi partiyaları Türkiyədə zəlzələdən zərərçəkən insanlara nə kimi yardım tədbirləri görür?
Edenws bununla bağlı siyasi partiya rəhbərləri arasında sorğu keçirib. Cavabları təqdim edirik:
Azərbaycan Xalq Partiyasının sədri Pənah Hüseyn:
“Partiya üzvləri şəxsi təşəbbüsləri ilə hazırda yardım toplama kampaniyasında iştirak edirlər. Bu haqda bizə məlumat verirlər. Partiya kollektivi olaraq isə müəyyən məbləğ toplamışıq. Maddi yardımı bu gün ya sabah banka köçürəcəyik. Bu gün əsas məsələsə zəlzələnin nəticələrinin aradan qaldırlmasıdır. Əsas vətəndaşların xilas olmasıdır. İnsanlara yardımların göstərilməsidir. Güman edirəm ki, türk milləti daxili, siyasi münasibətlərin fövqündə durur. Belə də olacaqdır, yaralarını saracaqdır. Daxildəki seçkilər, siyasi məsələlər isə dövətin mənafeyinə uyğun həll ediləcəkdir. Eyni zamanda hesab edirəm ki, bu fəlakət türk cəmiyyətini, vətəndaşını, dünya türklərini bir arada olmaq, həmrəylik nümayiş etdirmək, yardımlaşmaq uğrunda mübarizəyə qoşacaq”.
Müasir Müsavat partiyasının sədri Hafiz Hacıyev:
“Qardaş Türkiyədə baş verən faciə ilə bağlı Müasir Müsavat partiyasının, siyasi şuranın bütün üzvləri, rayon təşkilatları səfərbər edilib. Artıq yardımlarımız davam edir. Partiya üzvləri evlərindən yorğan, döşək, imkanı daxilində maddi kömək, lazım olan tədbirləri, əllərindən gələn hər şeyi edirlər. Bundan sonra da yardım fəaliyyətimizi davam etdirəcəyik. Hətta imkan versələr, Müasir Müsavat partiyasının üzvlərinin müraciəti var ki, onlar Türkiyəyə getmək istəyirlər. Faciə baş verən yerdə qardaşlarımıza, bacılarımıza kömək etmək istəyirlər. Bütün vasitələrə əl atmışıq. Bu gün də yardım davam edir, axıra qədər də davam edəcək”.
Azad Vətən partiyasının sədri Akif Nağı:
“Türkiyə üçün maddi yardım toplamışıq. Bütün partiya üzvləri bundan xəbərdardır. İsti paltarlar, lazım olan ehtiyaclar toplanır. Gün ərzində yardım üçün toplanan ianələr ofisə yığılacaq. Çox güman ki, sabaha yardımızı qardaş ölkəyə çatdıracağıq. Kömək etmək borcumuzdur. Yardımızımı davam etdirəcəyik”.
AĞ partiya sədri Tural Abbaslı:
Həm partiya olaraq, həm də partiyanın ayrı-ayrı üzvləri Türkiyəni bu və ya digər formada yardım göndərirlər. Rayon təşkilatlarımızda da yardım edilir. Bəziləri paltar, ədyal, bəziləri də əşya, ərzaq, pul yardımı edirlər. AĞ partiya adından rəsmi olaraq Ziraat bankına bəlli məbləğ göndərəcyik. Bu rəqəm simvolik də ola bilər. Mən demirəm ki, bizim yardımımız böyük olacaq, amma hər halda mövqeyimizi göstərəcyik. Həzrəti İbrahimin yandırılması məqamında qarışqanın bir damcı su daşıması kimi, odu söndümək üçün etdiyi mübarizə kimi olacaq. Bütün üzvlərimiz əllərindən gələn köməyi edirlər. Bütün Azərbaycan xalqı bu məsələdə yekdildir.
Kommunist partiyasının rəhbəri Rauf Qurbanov:
“Azərbaycan Kommunist Partiyası, Mərkəzi Komitəsi Türküyədə baş vermiş fəlakətlə əlaqədar Türküyə Kommunist, İşçi və Vətən partiyalarına Azərbaycan kommunistləri adından dərin hüzürlə baş sağlığı ünvanlayıb.
Madddi yardımla əlaqədar sualınıza cavab olaraq onu deyə bilərəm ki, hər bir kommunist fərdi şəkildə, öz imkanları daxilində Türküyəli soydaşlarımıza kömək edəcəkdir”.
Qeyd edək ki, son məlumata görə, Türkiyədə zəlzələdə ölənlərin sayı 6234 nəfərə çatıb, 37 011 nəfər isə yaralanıb.
Oğuz Ayvaz
