Xəbər verdiyimiz kimi, Şotlandiyanın Regional Baş naziri və Şotlandiya Milli Partiyasının sədri Nikola Stercen hər iki vəzifəsindən istefa verdikdən sonra Pakistan əsilli, müsəlman Həmzə Yusif seçkilərdə qalib gəlib. 37 yaşlı Həmzə Yusif Şotlandiyada partiya lideri vəzifəsini tutan qeyri-şotland əsilli ilk şəxsdir. Parlament tərəfindən təsdiq edildikdən sonra onun həm də baş nazir vəzifəsinə təyin ediləcəyi gözlənilir.
Lakin Britaniya mediasının pakistanlı Həmzə Yusif barədə fikirləri birmənalı deyil. Belə ki, ölkənin bəzi aparıcı qəzetləri onun haqqında tənqidi mülahizələr yayımlamaqdan çəkinmirlər.
Britaniyanın "The Sun" qəzeti yazır ki, Yusif keçmiş baş nazirin “dəmir” administrasiyasını xarakterizə edən bir çox cəhətlərə malik deyil.
Qəzetin yazdığına görə, yeni lider 10 il ərzində nazirliklərdə müxtəlif vəzifələrdə işlədiyi müddətdə ciddi səhvlərə yol verib.
Britaniyanın “Daily Mail” qəzeti isə Həmzə Yusifi öz nəslinin “ən yararsız siyasətçisi” hesab edib.
Qəzet Yusifin 2020-ci ildə irqçi bir açıqlama ilə çıxış etdiyini xatırladıb və bu açıqlama ilə onu ölkəsindəki bir sıra yüksək vəzifəli məmurlar arasında irqi ayrı-seçkilik etməkdə ittiham edib:
“Yusif unudub ki, rəsmi statistika Şotlandiya əhalisinin 96 faizinin ağdərili olduğunu, qaradərililərin isə cəmi 0,56 faiz təşkil etdiyini göstərir”, qəzet vurğulayıb.
“Ekspress” qəzeti isə Yusifin qələbəsini partiya üçün ən yaxşı nəticə hesab edib. Qəzet əlavə edib ki, hazırda ən düzgün yol hakim koalisiyanı qorumaqdır.
Bununla belə, vurğulanıb ki, Yusif dövlət işlərində geniş təcrübəyə və keçmiş baş nazir qədər ünsiyyət və polemika bacarıqlarına malik deyil.
Qeyd edək ki, Həmzə Yusif 1985-ci ildə Şotlandiyanın Qlazqo şəhərində anadan olub. 2007-ci ildə Qlazqo Universitetinin siyasi elmlər fakültəsini magistr dərəcəsi ilə bitirib. Şotlandiyada ədliyyə naziri və səhiyyə naziri vəzifələrini icra edib. 2011-ci ildə parlamentə seçilib.
Törə Zeynal
