Azərbaycan ordusu Laçın rayonunun Cağazur və Zabux kəndləri arasında yerləşən bir neçə hakim yüksəklikləri nəzarətə götürüb.
Həmçinin ərazidə yerləşən əsas və yardımçı yollar, eləcə də sərhədboyu geniş sahələr də bura daxildir.
Müdafiə Nazirliyinin verdiyi məlumata görə, işlər yeni Laçın yolunun istifadəyə verilməsi ilə əlaqədar həyata keçirilib. Qeyd edək ki, yüksəkliklər heç bir insident baş vermədən nəzarətə götürülüb.
Bəs, bu yüksəkliklərin nəzarətə götürülməsi Azərbaycan tərəfinə hansı prioritetləri verəcək?
Məsələ ilə bağlı Ednews-a açıqlamasında hərbi ekspert Alparslan İmamqulu qeyd edib ki, Cağazur və Zabux kəndləri arasında yerləşən bir neçə hakim yüksəklik, əsas və yardımçı yollarının nəzarətdə olması ölkəmiz üçün çox əhəmiyyətlidir.
“Ona görə ki, bu cür əhəmiyyətli, strateji yüksəkliklərin azad olunması ilə ordumuza yeni imkanlar verəcək. Ordumuz düşmənin hərəkət yollarını, qruplaşmalırını nazərdə saxlaya biləcək. Həmçinin, bu bölgədə Laçın qapı rolunu oynayır. Eyni şəkildə şərti sərhədlərimizdə, o cümlədən, tampon bölgə sayılacaq ərazilərimizdə hələ də mövcud terrorist qüvvələri var. Onların tam olaraq nəzarət altında tutulması və düzgün qiymətlənirilməsi üçün bu yüksəkliklər çox əhəmiyyətlidir”.
Aysel Şahmar