“Azərbaycan 44 günlük Vətən müharibəsindən sonra ikinci böyük faciəni yaşayır. Vətən müharibəsində biz düşmənlərimizlə problemi çözdük. 30 il işğal altında olan ərazilərimizi azad etdik. Baxmayaraq ki, bizim bu problemimizə biganə idilər. Beynəlxalq təşkilatlar Azərbaycanın mina probleminə ciddi yanaşmalıdırlar. Beynəlxalq ictimaiyyət Azərbaycanda mina təhlükəsinə səssiz qalmamalıdır”.

Bu fikirləri Ednews-a açıqlaması zamanı Beynəlxalq Avrasiya Mətbuat Fondunun (BAMF) prezidenti, ANAMA yanında İctimai Şuranın sədri Umud Mirzəyev səsləndirib. O, bildirdib ki, Ermənistanın Azərbaycana qarşı terroru davam edir.  

“Məhz bu ərazilərdə son 2 həftədə artıq 4-cü faciədir ki, yaşayırıq, 2 vətəndaşımız ayaqlarını itirib, 4 nəfər isə həlak olub. Sonuncu mina insidenti mayıın 1-də Cəbrayıl rayonunun Cocuq Mərcanlı kəndində yaşanıb. Hadisə zamanı atlı çoban tank əleyhinə minaya düşərək həlak olub. 

Mən dünyanın supergüc dövlətlərinə səslənirəm ki, bu terrora son qoysunlar. Qarabağda mina probleminə son qoyulmalıdır, orada məskunlaşan bir qrup terrora dəstək dayandırılmalıdır. Qarabağın sərvətlərini talayan, uzun illər torpaqlarımızdan narkotik ticarəti üçün istifadə etmiş terrorçu qüvvələr həmin bu problemləri yaradıblar. Mən dünyanın aparıcı təşkilatlarına bu işdə Azərbaycana dəstək olmaları üçün çağırış edirəm”.

Sonda U.Mirzəyev qeyd edib ki, BAMF 20 ildən artıqdır ki, ANAMA ilə tərəfdaşlıq edərək “Mina təhlükəsi ilə mübarizə proqramında fəaliyyət göstərir. 

“Biz Gəncədən tutmuş bütün bu regionda 11 min hektardan artıq ərazini minalardan təmizləmişik. Biz hər gün əməkdaşlarımızla söhbətlər apararaq təhlükəsizlik qaydalarına ciddi şəkildə əməl etmələrini tapşırırıq”.

Qeyd edək ki, 10 noyabr 2020-ci il tarixli Üçtərəfli Bəyamnamənin imzalandığı gündən 302 nəfər mina qurbanı qeydə alınıb. Onlarda 57 (44 mülki, 13 hərbiçi) nəfəri həlak olmuş, 246 (98 mülki, 148 hərbiçi) nəfəri isə müxtəlif dərəcəli bədən xəsarəti almışdır. Bundan savayı 131 nəfər kaset sursatlarının qurbanı olmuşdur. 1991-ci ildən bu günə qədər 3381 mina qurbanı qeydiyyata alınmışdır.

Oğuz

• Tag:
• Umud Mirzəyev:
• BAMF
• mina
• ANAMA