“Hər şeyi öz nəzarət çərçivəsində və konkret nəticələrə addımlar atmaqdadır. Bu həftə çərçivəsində XİN başçıları tərəfindən Azərbaycan və Ermənistan arasında sülh sazişi layihəsinə dair müzakirələr aparılacaq. Belə bir təcrübə indiyədək mövcud olmayıb. Bu, ABŞ-ın məsələyə nə qədər önəm verdiyinin göstəricisidir".
Bu sözləri Ednews-a açıqlaması zamanı politoloq Natiq Miri Azərbaycan və Ermənistan XİN rəhbərlərinin Vaşinqtonda görüşünü şərh edərkən bildirib.
O qeyd edib ki, ilk dəfədir ki, ABŞ Azərbaycan və Ermənistan arasındakı sülh müqaviləsinin imzalanması üçün bu qədər can atır:
“Bir həftə ərzində iki dövlət nazirinin fərqli mövqelərini yaxınlaşdırmaq və gələcəkdə bu sazişi imzalamaq üçün ilkin razılıq səviyyəsində yol xəritəsi çəkilir. Düşünürəm ki, bunun üçün potensial mövcuddur”.
Politoloq Ermənistanın birbaşa bu məsələdən imtina etməsinin mümkün olmadığını vurğulayıb:
“Azərbaycanın Ermənistanla olan sərhəddə sərhəd-buraxılış məntəqəsinin yaratması, fərqli reallıqlardır. Bu məntəqə onu göstərdi ki, Azərbaycan heç kəslə məsləhətləşmədən ərazi bütövlüyünü təmin etmək üçün qətiyyətli gücə malikdir. Ermənistan və Qarabağda mövcud olan sülhməramlılar istəsə, istəməsə də Azərbaycan öz suveren haqqlarını bu ərazidə bərqərar edəcək. Əgər razılıq olmasa Azərbaycan 10 noyabr sənədinin 4-cü müddəasını həyata keçirəcək. Yəni, silahlı dəstələri öz ərazisindən çıxaracaq. Bu da beynəlxalq hüquqa uyğun hərəkətdir”.
Natiq Miri Ermənistanın qaçacaq yerinin olmadığını da qeyd edib.
“Lakin Ermənistan istəyir ki, hüquq və təhlükəsizlik çərçivəsində beynəlxalq mexanizmlərin nəzarəti altında Qarabağdakı ermənilərlə Azərbaycan arasında danışıqlar aparılsın. Düşünürəm ki, bu məsələnin həlli üçün də ciddi problem yoxdur”.
Qeyd edək ki, Vaşinqtonda keçirilən görüşdə XİN başçıları tərəfindən Azərbaycan və Ermənistan arasında sülh sazişi layihəsinə dair müzakirələr aparılır. Müzakirələr Azərbaycanın xarici işlər naziri Ceyhun Bayramov və Ermənistanın XİN rəhbəri Ararat Mirzoyan arasında danışıqlar bir neçə gündür ki davam edir. Həmçinin, Ermənistan parlamentinin Avropaya inteqrasiya məsələləri üzrə komissiyasının sədri Armen Yeqoyan açıqlayıb ki, Azərbaycan və Ermənistan XİN başçıları tezliklə Moskvada da görüşəcək.
Aysel Şahmar