Paşinyan Rusiya ilə əməkdaşlığa görə ölkəsinə qarşı sanksiyalar tətbiq ediləcəyindən narahatdır.
Bunu Ermənistanın baş naziri Nikol Paşinyan Çexiya mətbuatına müsahibəsində bildirib. O qeyd edib ki, Ermənistan Rusiyanın tələblərini qarşılamaqdan məmnundur, ölkəsi sanksiya mallarına münasibətdə şəffaf olmağa çalışır və bu məsələ ilə bağlı Avropa İttifaqı, ABŞ və Rusiya ilə işləyir.
Düzdür, Paşinyan hakimiyyətdə olduğu dövrlərdə hər zaman öz Qərbyönümlü siyasəti ilə seçilib, lakin o, heç vaxt açıq şəkildə Rusiyaya qarşı bu qədər sərt mövqe ilə çıxış etməyib. Hazırda isə baş nazir çəkinmədən Rusiyaya kömək etməyəcəklərini vurğulayır.
Paşinyanın dəyişən siyasi baxışlarının arxasında nə dayanır?
“Paşinyanın ən böyük səhvi ondan ibarətdir ki, o, bir neçə kürsüdə əyləşib. Özünü o qədər ağıllı hesab edir, fikirləşir ki, həm dərin dövlətçilik təcrübəsi olan Rusiyanı, həm Avropanı, həm də ABŞ-ı aldada biləcək. Bu da mümkünsüzdür. Əks qütblərdə yer alan qüvvələrin heç də həmişə siyasi tələblərini yerinə yetirmək mümkün olmur. Ümumiyyətlə siyasətdə belə şey mümkünsüzdür. Paşinyan həm də Rusiya-Ukrayna müharibəsinin nəticəsindən qorxur. Dərk edir ki, Rusiya Ukraynada uduzsa, Ermənistana hücum edəcək, bu, birmənalıdır. Paşinyanı tək hakimiyyətlə yıxmayacaq, ölkəsini Rusiyanın bir əyalətinə çevirəcək”.
Bu fikirləri Ednews-a danışan, Paşinyanın oynadığı ikili oyunu şərh edən politoloq Cümşüd Nuriyev səsləndirib. O bildirib ki, Rusiyanın təhdidini anlayan Paşinyan ona qarşı aqressiv mövqe sərgiləməyə keçib və bu, gözlənilən idi:
“Rusiya başa düşməlidir ki, Ermənistan əvvəl-axır onu satmalı idi, bunu da edir. Ermənistanın nəyi var ki, ona qarşı sanksiya da tətbiq olunsun?! Onsuz da yaman gündədir, Rusiya qaz verməsə, bu onun sonu olar. Ermənistan özü özünü blokadaya alıb. Qonşuları ilə problem içindədir. Gürcüstanla münasibətləri yaxşı deyil, Türkiyə ilə sərhədi bağlıdır, Azərbaycanla da məlum məsələ. Ətrafındakıların hamısına qarşı təcavüzkar siyasət yürütdüyü üçün heç kim onunla normal qonşuluq münasibəti aparmaq istəmir. Görünən odur ki, Rusiya İrəvanda hakimiyyəti dəyişməyə çalışır, Amerika isə buna imkan vermir. Nə qədər ki, beynəlxalq güclər bir-birinin əleyhinə olacaq, Ermənistan elə düşdüyü vəziyyətdə çırpına-çırpına qalacaq”.
Törə Zeynal