Avropa İttifaqı Şurasının Prezidenti Şarl Mişel Qarabağ haqda danışarkən, orada yaşayan ermənilərlə Bakı arasında dialoq məsələsini önə çəkib. Beləliklə, Brüssel görüşlərində Qarabağın “status” mesajı olmadı. Yəni hesab etmək olarmı ki, artıq Avropa Birliyi də Qarabağla bağlı Azərbaycanın qəbul etməyəcəyi istəklərindən əl çəkib? Bu, onun mesajı idimi?

Bu barədə Ednews-a şərh verən politoloq Oqtay Qasımov bildirdi ki, Azərbaycanın mövqeyi konstruktiv olduğundan və beynəlxalq hüquqa əsaslandığından tərəflərin və ya vasitəçilərin buna etiraz edə biləcək əsasları yoxdur. 

“44 günlük Vətən müharibəsindən sonra dəfələrlə ən yüksək formada bildirmişik ki, Qarabağın dağlıq hissəsində yaşayan ermənilər Azərbaycan vətəndaşlarıdır, Azərbaycan vətəndaşlığını qəbul edərək onun qanunlarına tabe olan şəxslərin hüquq və təhlükəsizliyi Konstitusiyamıza uyğun, yəni ən yüksək şəkildə təmin ediləcək. Azərbaycan bu təminatı verir. Brüsseldəki görüşdə də bu, bir daha diqqətə çatdırıldı. Ermənistan uzun müddətdir bu məsələ üzərindən manipulyasiya ilə məşğuldur, hansısa “beynəlxalq mexanizm”in tətbiqin danışır. Əlbəttə, bunlar bizim üçün qəbuledilməzdir.

İndi Avropa Birliyi Azərbaycana çağırış edir ki, proses şəffaf həyata keçirilməlidir. Azərbaycanın bununla bağlı bir sıxıntısı yoxdur”.

Politoloq qeyd etdi ki, artıq Azərbaycanın rəsmi nümayəndələri Rusiya sülhməramlıların vasitəçiliyi ilə Qarabağ ermənilərinin nümayəndələri ilə görüşüb:

“Bundan sonra onlara təklif verildi ki, görüş Bakıda davam etdirilsin. Amma hələlik buna cavab verilməyib. Bunun da öz səbəbləri var. Çünki bu, ermənilərin iradələrinin özlərində olmaması və ya kənardan edilən təzyiqlərlə əlaqəlidir. Azərbaycanın mövqeyi isə dəyişməzdir. Qarabağ erməniləri Azərbaycan qanunlarını və vətəndaşlığını qəbul edib ərazimizdə yaşayacaqlarsa, onda bütün hüquq və təhlükəsizlik məsələləri həllini tapacaq. Hansısa “beynəlxalq mexanizm” kimi iddialar qəbul olunmayacaq”.

Oğuz