“Azərbaycan və Ermənistan arasındakı münasibətlər xaricdə Azərbaycanın istədiyi istiqamətdə işıqlandırılmır. Əksinə, daha çox Ermənistanın xeyrinə işıqlandırılır və insanlar da bu məlumatlara inanır”.
Bu sözləri Ednews-a AĞ Partiya sədri Tural Abbaslı bildirib. Onun sözlərinə görə, dünyanın böyük əksəriyyətində Azərbaycan qınanan, Ermənistan dəstəklənən tərəf olur. Bir neçə ölkədən başqa bütün Avropa və ümumiyyətlə, qərb mətbuatı Ermənistanı dəstəkləyir.
“30 illik işğaldan, Xocalı soyqırımından, Azərbaycana qarşı ədalətsizikdən yazılmır. Lakin Azərbaycan ərazilərini qorumaq üçün hər-hansı addım atanda işğalçı, qəsbkar, qaniçən kimi təqdim olunur. Etiraf olunmalıdır ki, bu istiqamətdə işlər görülməlidir. Bu işləri ayrı-ayrılıqda mətbuatın, partiya sədrlərinin, gənclərin üzərinə qoymaq doğru deyil. Bunların hamısını Azərbaycan dövləti təşkil etməlidir. Xaricdə yaşayan azərbaycanlılar diasporamızın səlahiyyəti daxilindədi. Onlar hər hansı bir proqram qəbul edə bilər və burada partiya sədrləri, media və ya gənclər təşkilatı iştirak edə bilər. Hətta beynəlxalq səviyyədə İsrail və Türkiyənin təcrübəsi də öyrənilə bilər”.
T.Abbaslı qeyd etdi ki, İsrail lobbi fəaliyyəti üzrə ən güclü ölkələrdəndir. Eyni zamanda, Türkiyənin də xarici ölkələrdə diasporası kifayət qədər güclüdür. Yəni, beynəlxalq təcrübə mübadiləsi aparılaraq Azərbaycanın beynəlxalq aləmdə imicinin yaxşılaşdırılması və yaxud reallıqların dünyaya çatdırılması istiqamətində bir yol xəritəsi müəyyən oluna bilər və bu yol xəritəsində hər kəsin üzərinə düşən öhdəlik açıq-aydın şəkildə göstərilməlidir.
“Dövlət yol xəritəsi tərtib tərtib etməli və proqram qəbul etməlidir deyə düşünürəm. Kor-koranə olaraq hərəkət etmək 100 ildən bəri formalaşmış erməni lobbisinə və diasporuna effekt verməz.
Şübhəsiz, gənclərin də fəaliyyəti önəmlidir. Sosial şəbəkələrdə hər bir gənc təbliğat maşını kimi fəaliyyət göstərə bilər. Amma bunu stimullaşdırmaq, həm də təşkil etmək lazımdır. Maddi-texniki tərəfini dövlət təmin etməlidir, eyni zamanda da informativ strateji taktik tərəfini müəyyən olunmalıdır ki, gənclər onu icra etsin. Həqiqətlərin dünyaya çatdırılması üçün dövlət düşünülmüş, davamlı addım atmalıdır”.
Nurlana Hacıyeva
