Deputat Elşad Mirbəşiroğlu Azərbaycan Respublikasının hərbi doktrinasına dəyişikliklər etməyi təklif edib. O, Azərbaycanın öz torpaqlarını azad edərək regionda yeni geosiyasi reallıqlar fomalaşdırdığını və təhlükəsizlik təmin etdiyini bildirib. Deputat xüsusilə 14, 15, 16 və 21 – ci maddələrin dəyişdirilməsini və təhlükəli ölkələr siyahısına Fransanın  da əlavə edilməsinə ehtiyac olduğunu bildirib.

 

Məsələ ilə bağlı Ednews-a  danışan hərbi ekspert Heydər Mirzə qeyd edib ki, Fransa ilə bağlı bu təklif tamamilə təbiidir. 

 

“Çünki Fransanın regionda yeritdiyi siyasət, istər prezidentimiz, istər XİN, istərsə də ictimai rəy səviyyəsində bir mənalı olaraq pozitiv qarşılanmır. Ona görə də bu təklifə haqq qazandırmaq olar. Hərbi doktrinanın dəyişilməsi məsələsinə gəldikdə isə, deputatın da qeyd etdiyi kimi II Qarabağ müharibəsindən sonra regional vəziyyət dəyişib və ona görə də dəyişiklik etməyə məncə də lüzum var. Sırf məsələni ona görə Fransa üzərinə cəmləşdirmək lazım deyil. Fransa məsələsinə tam haqq qazandırsam da bir məsələni də nəzərdən keçirmək lazımdır ki, hazırda Fransanın özündə kritik vəziyyət var. Hər an hökümət dəyişikliyi gözlənilə bilər və yeni hökümət necə siyasət yeridəcək onu bilmək olmaz. Əslində isə bizə sərf edən addımları Fransanın adını oraya salmadan da edə bilərik, necə ki edirik. Əlavə olaraq qeyd edim ki, cənab prezidentimiz 44 günlük müharibədən qısa müddət sonra anons verərək rəsmi ictimailəşdirərək qeyd etdi ki, Azərbaycan Silahlı Qüvvələri, Türk Silahlı Qüvvələrinin modelinə keçib. Bu məsələnin özü belə doktrinada dəyişiklik etmək üçün yetərli səbəbdir. Düşünürəm ki, Azərbaycan üçün təhlükəli ölkələrin siyahısına Fransadan savayı İranın da adı əlavə edilə bilər. Hazırda cənub qonşumuz bizə daha çox təhdid yarada bilər. Ona görə də doktrinaya dəyişiklik edilməsi müzakirə oluna bilər”.

 

Hərbi ekspert Ramil Məmmədli isə bu barədə fərqli düşünür. Onun sözlərinə görə, ümumiyyətlə hərbi doktrinanın qəbul edilməsi və bunun aspektləri barədə Azərbaycan cəmiyyətində müfəssəl bir məlumat yoxdur. 

 

“Buna görə də, düşünürəm ki, ilk növbədə bu məsələ ictimai müzakirəyə çıxarılmalıdır. Əsasən də ictimai təşkilatlar, hərbi və hərbi-siyasi kontekstdə fəaliyyət göstərən təşkilatlar və şərhçilər arasında müzakirələr olunmalıdır. Bu məsələnin birinci tərəfidir. Digər tərəfi isə odur ki, Azərbaycan öz regionunda və ümumiyyətlə dünyada siyasi gedişat tamamilə dəyişib. 2014-cü ildən etibarən ən əsası da, Rusiya Krım və Donbass ərazilərinə ilhaq etdikdən sonra gedişat dəyişməyə başlayıb. Ona görə də Azərbaycan öz daxilində və həmçinin xarici siyasətdə baş verən dəyişikliklərə əsasən doktrinasını dəyişməlidir. Ələxsus Azərbaycanın xarici siyasəti bizə müəyyən şeyləri agah edir ki, ölkəmizin siyasəti vəəlaqələri hansı formada cərəyan edir. Ona görə də məncə müəyyən məsələlər açıq bir şəkildə doktrinada qeyd edilməlidir. Məsələn, Azərbaycan-Rusiya, İran, Türkiyə, Gürcüstan, ABŞ, NATO və Avropa münasibətləri ilə bağlı qeydlər olunmalıdır. Hər bir halda Azərbaycan müharibənin qalib tərəfi olduğu halda bu dəyişikliklərin baş verməsi normal haldır. Zənnimcə fundamental olaraq deyildə, əsasən baş verən prosesləri izləyərək, taktiki olaraq müəyyən dəyişikliklər etmək olar”.

 

Əkbər Şəbəndəyev