"Azərbaycanın suveren hüququ beynəlxalq məhkəmə müstəvisində də qəbul olunur. Beynəlxalq Ədalət Məhkəməsinin Ermənistanın Laçın yolunun başlanğıcında sərhəd-buraxılış məntəqəsinin quraşdırılmasının “qanunsuz” olmasına dair vəsatətinin rədd olunması bunu bir daha təsdiqlədi. Belə ki, məhkəmə bu qərarı ilə faktiki olaraq Azərbaycanın dövlət sərhəd buraxılış məntəqəsinin qurulmasının beynəlxalq hüquq tərəfindən tanındığını təsdiqləmiş oldu. Laçın yolundan Azərbaycan silahlı qüvvələrinin çıxarılması ilə bağlı öhdəliyinin olmadığı ilə bağlı məsələ də təsdiqləndi. Təbii ki, Azərbaycanın bu dövlət sərhəd buraxılış məntəqəsinin qurulması ilə Laçın yoluna tam nəzarət etmək haqqı var və beynəlxalq məhkəmənin qərarı da bunu təsdiqləyir".
Bu sözləri Ednews-a millət vəkili Könül Nurullayeva deyib. Onun sözlərinə görə, bu qərarla eyni zamanda Ermənistanın iddia etdiyi kimi guya əvvəlki qərarda Azərbaycanın beynəlxalq qərarları pozmasına dair iddialarında əsassız olduğu müəyyənləşdi.
"Beləliklə, Beynəlxalq Ədalət Məhkəməsi Azərbaycanın haqlı mövqeyini dəstəkləməklə Azərbaycanın suveren ərazilərini tanıdığını da elan etmiş oldu.Bir sözlə, erməni təbliğatına baxmayaraq, Azərbaycanın suveren hüququ beynəlxalq məhkəmə müstəvisində də qəbul olunur. İstər Ermənistan, istərsə də Fransa başda olmaqla digər havadarların bu istiqamətdəki pozucu səyləri də fiaskoya uğradı. Ümumiyyətlə, Azərbaycanın bütün addımları beynəlxalq hüququn norma və prinsiplərinə əsaslanır.
Ötən ay Ermənistan tərəfinin Laçın Sərhəd Nəzarət Məntəqəsində xidmət göstərən Dövlət Sərhəd Xidmətinin hərbi qulluqçularına odlu silahlardan atəş açması, nəticədə DSX-nin hərbiçisinin yaralanması bölgədə sülhü pozmağa yönələn addım idi. Bu, Ermənistan silahlı qüvvələrinin Azərbaycana qarşı törətdiyi məqsədyönlü təxribatı idi. Qarabağda yaşayan ermənilərin reinteqrasiyası ilə bağlı münbit şəraitin yarandığı bir vaxtda pozucu qüvvələrin fəallığı müşahidə olunmaqdadır. Bu təxribatlara rəğmən, Azərbaycan yenə konstruktuv yanaşma sərgilədi. Təhlükəsizlik tədbirləri ilə əlaqadər Laçın nəzarət-buraxılış məntəqəsindən keçid dayandırıldı. Erməni lobbisinin maliyyələşdirdiyi avropalı məmurların canfəşanlığının da heç bir əsası yoxdur. Çünki yayılan videogörüntülərdən də aydın olur ki, yol humanitar məqsədlər üçün açıqdır".
Oğuz
